Covalima (RCCT) 11-06-25-Governu liu husi Sekretaria Estadu Protesaun Sivil (SEPS) hamutuk Autoridade Munisipiu Covalima distribui ona material konstrusaun no osan ba vitima dezastre ho tipo lahanesan hamutuk uma kain 42.
Reprezenta Sekretriu Estadu Protesaun Sivil (SEPS), Gui Caeiro, relata total orsamentu ne’ebé governu ba vitima dezastra iha Covalima hamotuk dolar amerikanu rihun tolu nulu resin lima, atus hitu ($ 35,700.00) iklui apoiu mos material konstrusaun ba kada vitima.
“Material konstrusaun ho osan ne’ebé ita apoiu ba atu utiliza ho dignu, uza tuir nia dalan. Dadus ne’ebé atu halo distribui ba ohin loron nian hamutuk vitima uma kain 42. Kada ema simu osan ba at total nian ho montante osan dolar amerikanu rihun ida ($ 1.000), ba at naton osan dolar amerikanu atus hitu lima nulu ($ 750.00) ba at k’man simu osan dolar amerikanu atus nen ($ 600.00), inklui ho osan transporte nian, total orsamentu ba Munisipiu Covalima hamutuk osan montante dolar amerikanu rihun tolu nulu resin lima, atus hitu ($ 35,700.00). Ho ida ne’e husu inan no aman sira atu bele utiliza ho di’ak, tanba iha ne’e Autoridade Protesaun Sivil ho parseiru dezenvolvimrntu sira, parte seguransa liliu Ofisial Polisia Suku sei halo monitorizasaun tun direita ba hare ita bo’ot sira lori sasan no osan ne’e ba halo duni uma ka lae, tanba iha fulan tolu nia laran hakarak ka lakohi ita bo’ot sira tenke hari duni uma, ida ne’e maka estadu nia kbi’it hodi apoiu ba ita bo’ot sira, tan ne’e husu ba inan aman sira bele harii dadaun ona uma” nia informa.
Reprezentante Prezidente Autoridade Munisipiu (PAM) Covalima, atual Diretór Servisu Munisipal Protesaun Sivil no Jestaun Dezastre Naturais, João Martins, husu ba vitima sira ne’ebé hetan ona apoiu husi governu, tenke koopera ho xefe suku, xefe aldeia no OPS hodi konstrui uma.
“Ohin Autoridade Munisipiu Covalima hamutuk Atoridade Protesaun Sivil husi nasional halo distribuisaun ba ita bo’ot sira ne’ebé maka hetan dezastre ona tinan ida rua ka liu ba, reprezenta autoridade Covalima, PAM nia fo mensajem maka ne’e husu ita bo’ot sira atu kopera ho ita bo’ot sira nia autoridade lokal hanesan xefe suku, xefe aldeia atu konstrui ita bo’ot sira nia uma ne’ebé hetan estragus iha momentu kalamidade ka dezastre ne’ebé akontese iha ita bo’ot sira nia fatin” dehan Diretór Servisu Munisipal Protesaun Sivil no Jestaun Dezastre Naturais (SMPSJDN), João Martins.
Vitima Cecilia da Costa, orgullu no agradese apoiu ne’ebé governu fo liu husi ajuda material konstrusaun no osan hodi konstrui fali uma ne’ebé hetan estragau husi dezastre, nune’e nia sei kumpri utiliza apoiu ne’e hodi hari fali ninia uma.
“Ha’u sente orgullu ba governu tanba fo ona apoiu ba ami ne’ebé maka hetan dezastre iha tinan 2023 liu ba, ne’ebé ami sente apresia ba ajuda ida ne’e, ha’u garantia iha fulan tolu nia laran bele finaliza konstrusuan ba uma” nia informa.
Engkuantu alende fo apoiu material konstrusaun no osan rekoperasaun, governu liu husi SEPS no Autoridade Munisipiu Covalima mos prepara formatu deklaraun ba vitima sira atu bele deklra sira nia kompremisiu hodi utiliza material konstrusaun no osan hodi hari fali sira nia uma ho durasaun durante fulan tolu nia laran.
Jornalista : Julio Salinas
Editor : Chamot Nahac
