Covalima (RCCT) 26-08-2026–Autoridade Munisípiu Covalima liu husi Servisu Munisípiu Administrasaun Rekursu Umanu rejista funsionáriu públiku na’in-20 ne’ebé tama iha lista reforma obrigatóriu durante períodu 2024 to’o 2026.
Diretór Servisu Munisípiu Administrasaun Rekursu Umanu, José Manuel Gonçalves, hateten katak funsionáriu na’in-20 ne’e servisu iha Autoridade Munisípiu Covalima no sira-nia naran tama ona iha lista reforma obrigatóriu tuir sistema Komisaun Funsaun Públika (KFP).
Ita-nia funsionáriu iha Autoridade Munisípiu Covalima, espesiálmente iha rejime jerál ne’ebé responsavel ba área Servisu Munisípiu Rekursu Umanu, durante períodu 2024 to’o 2026, hamutuk funsionáriu na’in 20 mak sira-nia naran tama iha lista reforma obrigatóriu”, José Manuel Gonçalves, informa.
Nia esplika katak, bainhira funsionáriu sira-nia naran tama iha lista reforma obrigatóriu, sistema Komisaun Funsaun Públika (KFP) sei hapara automatikamente salariu funsionáriu refere, hahú husi loron ne’ebé nia naran tama ofisiálmente iha lista reforma obrigatóriu.
Tuir nia, maski saláriu funsionáriu sira ne’e hapara ona, sira sei iha direitu atu simu benefísiu pensaun liuhosi Institutu Nasionál Seguransa Sosiál (INSS), maibé tenke kompleta no submete dokumentu hotu ba Servisu Munisípiu Administrasaun Rekursu Umanu Covalima.
Rekursu Umanu sei simu dokumentu husi funsionáriu sira, depois submete ba Komisaun Funsaun Públika no kontinua hato’o ba INSS atu prosesa sira-nia direitu ba pensaun,” nia dehan.
Relasiona ho substituisaun funsionáriu sira ne’ebé reforma obrigatóriu, tanba Autoridade Munisípiu Covalima la bele halo rekrutamentu funsionáriu públiku foun , tanba tuir desizaun Konsellu Ministru ne’ebé la autoriza prosesu rekrutamentu foun. Nune’e, atu garante kontinuidade servisu públiku iha instituisaun, Autoridade Munisípiu uza funsionáriu kazuál sira ne’ebé hetan kapasitasaun tuir área servisu ida-idak, atu bele aumenta sira-nia koñesimentu no kapasidade antes hala’o knaar administrativu, José Manuel Gonçalves, relata.
Funsionáriu na’in-20 ne’ebé tama iha lista reforma obrigatóriu ne’e mai husi servisu oioin iha Autoridade Munisípiu Covalima, inklui Servisu Munisípiu Agrikultura Covalima, Servisu Munisípiu Administrasaun Rekursu Umanu, Servisu Munisípiu Edukasaun, Servisu Munisípiu Jestaun Merkadu, Servisu Munisípiu Asaun Sosiál no postu administrativu sira.
Jornalista Paul Mandeu
