Covalima (RCCT) 24-04-25-Durante ne’e Aeroportu Internasional em Xefe das Falintil Kay Rala Xanana Gusmão iha Munisipiu Covalima no Portu iha Suku Suai Loro la hatama reseitas ba estadu tanba laiha movimentasaun, maibe tuir estimasaun hahu fulan Juñu tinan ne’e Aeroportu no portu refere bele ona hatama reseitas ba kofre estadu.
Diretór Alfandega Munisipiu Covalima Nuno Nogueira, dehan lia ne’e hafoin fila husi enkontru ho Prezidente Autoridade Nasional Petroliu no Minerai (ANPM) iha dili, foin lalais.
“Ami enkontru ho prezidente ANPM iha Dili, estimasaun ne’e iha fulan Juñu ba leten ne’e helikoptru hotu sei semo mai para iha ne’e, depois iha atividades explorasaun mina nian ne’e aviaun Jet husi Australia sei mai” Diretór Alfandega Munisipiu Covalima Nuno Nogueira Informa.
Diretór Nuno haktuir, durante ne’e seidauk rekolla reseitas husi Portu Suai Loro no Aeroportu Suai tanba seidauk iha Movimentasaun.
“To’o agora ne’e taxa husi Aeroportu seidauk iha inklui ita nia portu Suai-Loro mos seidauk iha, maibe daudauk ne’e taxa ita kobra husi Postu Integradu Salele deit” nia dehan.
Tuir Diretor Alfandega Munisipiu Covalima Nuno Nogueira, dehan durante ne’e husi fatin rua ne’e maka la hatama reseitas ba estadu tanba laiha atividade aviaun semo no tun iha Aerpportu no laiha roo maka atraka iha portu Suai Loro, maibe liu husi enkontru foin lalais iha Dili fo sai ona katak hahu fulan Juñu tinan ida ne’e, portu rua refere bele ona hatama reseitas ba kofre estadu timor nian.
Jornalista : Julio Salinas
Editor : Chamot Nahac
