Covalima (RCCT) 23-01-25-Diretór Servisu Munisipal Seguransa Alimentar Munisipiu Covalima Hilario Oliveira relata, dadaun ne’e vendedor sira iha merkadu suai kontinua fa’an sasan liu liu nesesidade baziku ho folin ne’ebé normal.
Nia dehan, bazeia ba observasaun iha merkadu suai, la deteta konaba manipulasaun folin sasan husi negosiante iha merkadu suai.
“Ha’u hanoin agora ita lalika hanoin barak konaba pressu iha merkadu liliu ba nasesidade baziku folin sa’e, maibe hafoin ekipa tun ba iha terenu hodi rekolla dadus konaba folin sasan iha merkadu folin sei kontinua la’o normal, laiha presu ne’ebé sa’e maka’as liu ne’e laiha” dehan Diretór Servisu Munisipal Seguransa Alimentar Munisipiu Covalima Hilario Oliveira.
Hilario dehan lian ne’e bazei ba rezultadu levantamentu dadaus konaba folin sasaun iha merkadu suai, ekipa tekniku, Diresaun Servisu Munisipal Seguransa Alimentar Munisipiu Covalima, hala’o foin lalais ne’e.
“Iha semana kotuk ami rekolla ona no iha sesta semana ne’e komesa kontinua rekolla dadus, tanba iha loja balu ekipa tekniku sira foti ona, maibe iha fulan ida ne’e nia laran ami seidauk fo sai katak ninia pressu ba produtu sira ne’e iha mudansa ka lae, maibe semana ne’e nia laran ami bele hatene ona katak presu ba produtu lokal no produtu importadu sira ne’e maizumenus ninia presu ne’e iha mudansa no laiha mudansa ne’e ami sei bele sai ba iha publiku atu bele hatene, maibe fulan ne’e nia laran ami sei dauk bele fo sai tanba ami sei lao hela foti dadus” nia dehan.
Enkuantu ekipa tekniku husi Diresaun Servisu Munisipal Seguransa Alimentar Munisipiu Covalima kontinua halo levantamentu dadus folin sasan ho negosiante iha merkadu suai. Tanba ne’e, Diretór Servisu Munisipal Seguransa Alimentar Munisipiu Covalima Hilario Oliveira, husu komunidade Covalima atu labele preokupa ho folin nesesidade baziku iha merkadu tanba folin sasan sei kontinua la’o normal hanesan baibain.
Jornalista : Julio Salinas
Editor : Chamot Nahac
