Covalima (RCCT) 04-01-24-Nesesidade baziku iha merkadu Munisipiu Covalima liliu folin fos kontinua sa’e fo impaktu ba povu ki’ik ne’ebé laiha kbi’it atu bele sosa hodi aguenta moris loron loron nian.

Sekretaria Munisipiu Covalima Francisco de Jesus Alves, hatete katak Xefe suku sira fo informasaun ba Administrasaun Munisipiu Covalima konaba folin fos karun liu iha postu administrativu sira ne’ebé distansia dook husi kapital munisipiu.

“Fos kontinua folin sa’e nafatin, informasaun ida ne’e ami rona ona husi ita nia xefe suku sira, na’i administrador postu sira ne’ebé mak hato’o, la’os deit iha postu Suai ne’e maibe sofre liu ita nia komunidade sira hela iha Postu Administrativu Fatumea, Fohorem no Fatululik ne’e fos karun liu tan, maibe kompetensia ne’e la’os iha ami oinsa maka halo intervensaun, ami so bele hala’o relatoriu ba iha nasional oinsa mak bele tun mai halo intervensaun ba folin fos ida ne’e, ne’ebé hanesan autoridade lokal liu husi meus ida ne’e husu ba Ministeriu Komersiu no Industria atu bele servisu hamutuk Kamra Komersiu Munisipiu Covalima nian bele halo intervensaun ba folin fos iha merkadu urjentemente” Sekretaria Munisipiu Covalima Francisco de Jesus Alves, ba RCCT iha nia knar fatin Administrasaun Munisipiu Covalima Kinta (04/01/24).

Sekretaria Munisipiu Covalima Francisco de Jesus Alves, haktuir folin fos sa’e akontese kedas iha tinan kotuk (2023) nune’e hato’o ona ba Vise Ministru Komersiu no Industria, iha tempu ne’eba, wainhira mai halo vizita iha Covalima.

“Ha’u hanoin loos iha vizita ida husi Vise Ministru Komersiu no Industria nian mai iha Munisipiu Covalima la sala iha l4 Dezembru 2023 nian mai ita hanesan autoridade lokal hato’o ona, no mos iha momentu ne’eba Vise MCI responde kedas ho meus ida ne’ebé halo servisu hamutuk ho Kamra Komersiu Munisipiu Covalima ne’ebé maka atu halo intervensaun ba folin fos iha merkadu, maibe momentu ne’eba sira la konsege halo, iha pesoal na’in ida ka rua ba iha ne’eba sosa fos lori mai dala ida deit maibe stok hotu ona entaun ita la konsege sosa lori mai barak liu tan atu nune’e bele halo intervensaun iha merkadu, tan ne’e maka folin fos kontinua sa’e nafatin iha Covalima” nia dehan.

Entertantu tuir Sekretaria Munisipiu Covalima Francisco de Jesus Alves, katak oras ne’e folin fos kontinua sa’e maka’as iha Covalima, poir liu tan area rural sira ne’ebé dok husi kapital munisipiu, tan ne’e hakarak hato’o ba governu liu husi Ministeriu Komersiu Industria atu bele halo intervensaun urjente ba folin fos iha merkadu sira.

Jornalista : Julio Salinas / Moi Chung

Editor       : Chamot Nahac