Administrador Postu Administrativu Maukatar, Constantino do Carmos Cardoso, saran lia dehan feto nia luta hahu kedas iha tinan 1975 hafoin Timor-Leste Proklama unilateralmente ba independensia, istoria hatudu katak feto involve iha vida politika hanesan Rosa Muki Bonaparte, Maria Tapo inklui feto barak mos sai delegada iha luta ida ne’e.

“Feto nia luta hahu kedas iha tinan 1975 ida ne’ebé Timor-Leste proklama Unilateralmente ba Independensia Timor Lorosa’e ninian, istoria hatudu momoos katak ema feto involve iha politika nasionalmente hanesan Rosa Muki Bonaparte, Nicolao Lobato nia ferik oan, husi ne’eba mai to’o iha rai klaran maka hanesan Maria Tapo, hakat liu mai iha Postu Maukatar feto barak mos involve iha luta libertasaun nasional maka iha 1975-1976 feto barak sai delegada ba funu ninian, inklui ha’u nia inan rasik mos delegada ba funu nian” Informa Administrador Postu Administrativu Maucatar, Constantinho do Carmos Cardoso, iha nia diskursu hafoin partisipa iha Komemorasaun Feto Nasional Timor-Leste ba dala 47 ne’ebe hala’o husi Sekretariu Estadu Iguakdade iha Salaun enkontru Postu Administrativu Maucatar, Tersa (12/12/23).

Cosntantino saran tenik hodi konta dehan, “labele esklui ema istoria, ko’alia buat ne’ebé loloos ne’e iha Maukatar, maibe la’os deit feto sira iha Maukatar deit, maibe husi ne’e tun ba iha Matai mos feto ida naran Maria Susu Mesak no hakat liu ba iha Kamanasa feto ida ne’ebé oras ne’e daudaun hela iha Tilomar naran Maria Tirilou, no kontinua ba iha fronteira Fatumea inan feton ida naran Rafu Leto ne’ebé ema feto Timor-Leste barak mos involvimentu iha funu libertasaun ida ne’e as tebes” informa Administrador Postu Administrativu Maucatar, Constantinho do Carmos Cardoso, hasara.

Iha fatin ne’e, Pontu Fokal Sekretaria Estadu ba Igualidade (SEI) iha Munisipiu Covalima Francisco T.G. de Araujo afirma hakarak valoriza feto sira nia kontribuisaun ba luta libertasaun nasional, liu husi komemorasaun Loron Nasional Feto Timor Leste tanba depois Timor-Leste restaura ninia independensia feto sira kontinua fo nia kontribuisaun ba dezenvolvementu nasional.

“Ita kontinua komemora loron ida ne’e hodi valoriza no fo koñesimentu ba feto ninia kontribuisaun hamutuk ho mane maluk sira ba luta libertasaun nasional, ba tinan ida ne’e ita komemora loron nasional feto ne’e ba dala 47 ho nia tema Feto Prontu Lidera, uluk, agora no futuru ligadu ba tema ida ne’e, ha’u hakarak hatete katak depois restaura ita nia independensia feto mos nafatin fo nia kontribuisaun hamutuk ho mane sira hodi bele dezenvolve hadi’a rai ida ne’e liu husi planu orsamentu no programa sira, feto sira nafatin fo sira nia kontribuisaun haree ba komprimisiu sira ne’ebé maka ita nia eroina feto sira halo ba luta libertasaun nasional, partisipasaun feto iha Parlamentu nasional ita haree iha sesta lejislatura ne’e feto ida mos sai hanesan prezidente parlamentu nasional ne’e marka istoria foun ida ba feto sira katak feto mos bele sai lideransa” nia dehan Pontu Fokal SEI iha Covalima Francisco T.G. de Araujo.

Reprezentante Feto Maukatar Vitoria Cardoso, sente kontente tanba Governu liu husi SEI bele mai komemora loron nasional feto iha Maukatar.

“Ami kontente no apresia tebes tanba ohin ita hotu hamutuk komemora loron feto mai iha Maukatar, tanba ne’e ami rekomenda katak aban bainrua ami mos bele kria grupu ka atividade iha ami nia aldeia, suku no postu, liu husi formasaun ne’ebé ami hetan bele fahe tutan ba maluk feto sira ne’ebé ohin la prezensa iha komemorasaun ida ne’e” Vitoria Cardoso espresa.

Entertantu komemorasaun loron Nasional Feto ba dala 47 Iha iha Munisipiu Covalima ho tema feto prontu lidera, uluk, agora no ba futuru, ne’e realiza iha salaun Administrasaun Postu Administrativu Maukatar, ne’ebé partisipa masimu husi feto potensial sira iha Postu Maukatar.

Jornalista : Julio Salinas

Editor          : Chamot Nahac