COVALIMA—–Tama ba faze daruak nian Programa Nasionál Dezenvolvimentu Suku (PNDS), oras ne’e daudaun tékniku no enjineiru sira hala’o levantamentu dadus ba rai atu konstrui Uma Kbi’it Laek (UKL) 278 iha Munisípiu Covalima.
“Atividade Programa Nasionál Dezenvolvimentu Suku (PNDS), ba tinan 2022 ita sei konstrui UKL ho unidade 278 ne’ebé faze implementasaun to’o ona levantamentu tékniku ba iha uma fatin ne’ebé atu konstrui ba benefisiariu ne’ebé elizivél simu uma refere” deklara Diretór PNDS Munisipiu Covalima, Filipe Cardoso ba jornalista sira iha nia kna’ar fatin segunda (04/04).
Nia sublina implementasaun ba konstrusaun UKL iha Munisipiu Covalima tekniku PNDS, sei iha faze identifikasaun no levantamentu ho númeru UKL unidade 278, liga ho forsa trabalu enjineiru no tékniku PNDS covalima ne’ebé menus maibé hetan apoiu hosi PNDS nasionál no parseiru sira.
Hafoin Prosesu tékniku levantamentu bazea ba ida ne’e, ita foin prepara dezeñu no BOQ hodi halo estimasaun kustu orsamentu hakarak faze tuir mai asina akordu implementasaun hodi submete ba Ministériu finansas (MF), hahu prosesa orsamentu no orsamentu transferidu ekipa bele hahu ona implementasaun.
Maibe kona-ba orsamentu konstrusaun UKL ho unidade 278 seidauk bele fó sai tanba tékniku no enjineiru PNDS, sei iha faze prosesu levantamentu rai hodi konstrui UKL ba benefisiariu sira ba faze daruak nian.
“Ha’u seidauk bele mensiona fundu infraestrtura konstrusaun UKL ho unidade 278, atu finansia konstrusaun UKL provizóriu levantamentu tékniku ba fatin seidauk konklui ba UKL ho unidade 278” nia dehan.
Nia afirma bazea rezultadu hosi levantamentu foin bele klasifika orsamentu, tipu uma ho medida 3x7 metru kuadradu kuartu rua, ho nia orsamentu masímu $14,000 to’o 15,000 no tipu uma 4x8 metru kuadradu kuartu tolu, ho nia orsamentu masímu $ 17,000 hodi bele hatene tipu medida uma.
Enkuantu, UKL unidade 278 ne’e sei implementa iha postu administrativu 7,suku 30 iha munisipiu Covalima.(azu)
