Familia Vitima Dezastre Naturais hamotuk Uma ka’in 5 iha Postu Administrativu Maukatar hetan apoio material konstrusaun.

COVALIMA-RCCT- Servisu Protesaun Sivil Municipio Distribui Material konstrusaun ba familia vitima ba desastre naturais hamotuk uma kain 5 iha Posto Maukatar.

Ponto Fokal servisu operasional desastre naturais Covalima Dinis Ferreira Afirma, Material konstrusaun hirak ne’e mak hanesan; Semente, kalen, besi beton, no pregu. No material sira ne’e fo ba familia vitima sira nebe afeita ba dezastre naturais hanesan anin sobu uma iha Fulan Maio 2020 ne’e.

“Ohin loron iha Posto Maukatar ami apoio familia vitima sira n’ee tamba uluk sira nia uma hetan estragus husi anin bo’ot no udan, no material nebe maka ami apoio ne hanesan semente, besi beton, pregu, no kalen,”  Dehan Dinis Ferreira ba RCCT Quarta Feira (24-09-20).

Tanba ne’e Xefe Seksaun Planeamento no Desenvolvimento Lokal Adriana da Costa, nebe Reprezenta Administrador Posto Administrativu Maukatar husu ba Familia Vitima Sira atu utiliza ho di’ak material nebe Estadu apoio ona ne’e.

Husu deit ba familia vitima sira nebe ohin loron simu ona material konstruksaun ne’e atu labele faan  no labele fo ba komunidade seluk atu impresta tamba ida ne’e konsidera sasan estado nian. ” Dehan Xefe Seksaun Planeamentu Lokal Adriana Da Costa.

Iha fatin Vitima Terezina da Costa orgulho ho apoio ne’e tamba bele haforsa ona sira hodi halo fali uma nebe hetan estragus husi anin bo’ot.

Ho apoio ida n’ee ha’u kontente tebes tamba maske ami la iha forsa atu halo foun fali uma ne’e, maibe liu husi estado nia apoio ami bele halo ona uma nebe maka anin bot estraga iha fulan maio liu ba” Terezinha dehan.

Tuir Informasaun nebe RCCT asesu katak iha Municipio Covalima iha Posto Administrativo 4 iha Vitima ba Dezastre Natural iha fulan Maio 2020, no vitima sira nebe hetan ona apoio material konstrusaun  hamotuk 18 nebe kompostu husi Posto Administrativu Zumalai Vitima na’in 9, Maukatar na’in 5, Suai na’in 3, Tilomar na’in 1.

Jornalista : Tino Gusmão

Editor           : Chamot Nahac