Covalima (RCCT)09-09-2025- Polisia Nasional Timor Leste (PNTL) liu husi Komandu Munisipiu Covalima ensera ona atividade desportiva Jogu Futsál Femenina nivel Sekundária, ne’ebé haneran Kopa Polisiamentu Komunitária 2025 (POLKOM CUP 2025). Atividade desportivu jogu futsál ne’e no Finansia husi Parseiru dezemvolvimentu The Asia Foundation (TAF) no Kompañia Internasional no Lokal sira ne’ebé eziste iha Munisípiu Covalima.
Partisipa iha enseramentu ba atividade desportu komunitaria ne’e Reprezentante Komandante Jeral PNTL atual Xefe Departementu Prevensaun konflitus Komunitária husi Diresaun Polisiamentu Komunitária, Superintendente Polísia Joni Viana das Regras, informa atividade ne’e realiza hodi promove foinsa’e feto sira nia talenta desportivu liu liu iha modalidade futsál no objetivu seluk mak hakarak prevene konflitu entre juventude sira.
“Promove ita nia feminina sira iha talentu futsál ne’e rasik, oinsa ita hare ba situasaun rai laran liu husi desportu komunitariu, ita bele halo prevensaun ba konflitu sira iha rai laran liuliu iha idak-idak nia Munisipiu espesial iha Munisipiu Covalima, ba futuru atu bele lori inan feton sira husi Munisipiu ba iha Nasional para sira bele demonstra sira ninia talentu fotsál no aumesmu tempu sira mos hatudu oinsa atu bele hametin espiritu amizade fraternidade entre feto ho feto iha munisipiu no iha nasional” Superintendente Polísia Joni Viana das Regras dehan.
Superintendente Polísia Joni Viana das Regras mos fundamenta katak, tempu badak sei realiza tan eventu desportivu ho modalidade fotsál ba juven mane sira, no mos Komandu Polisia Covalima sei akompaña ekipa vensendor iha POLKOM CUP 2025 fotsál feto hodi ba kompente iha nasional.
“Iha tempu badak mos sei realiza I fo oportunu ba sira ne’ebé sai hanesan vensedor atu bele ba kompete iha nsional I aumesmu tempu loke mos oportunu ba fotsál ba ita nia alin mane sira ba joventude sira para oinsa sira mos kompete hanesan mos fotsál ba feminine. Ita hein despasu husi Komandante Jeral da PNTL bele akontese iha tempu badak” tenik nia.
Iha Jogu Final ne’e, ekipa husi Eskola Sekundária Jeral Públiku Seran Kotek Suai (ESGP) kontra ekipa Eskola Sekundária Jeral Katólika Ave-Maria Suai (ESCAM) ho golu 3-2, iha ne’ebé fo oportunidade ba ekipa Eskola Sekundária Jeral Públiku Seran Kotek sai Kampeonatu, no segundu Lugar okupa husi Eskola Sekundária Jeral Katólika Ave-Maria Suai, Terseiru Lugar husi Eskola Sekundária CAFE Suai, Kuartu Lugar husi Eskola Sekundária Jeral Públiku-Filial Salele. no Melora Jogadora husi Eskola Sekundária Jeral Katólika Ave-Maria Suai ho naran Martinha Anita Belo.
Jornalista : Gabriel Amaral da silva
Editor : Chamot Nahac
