COVALIMA—-Padre Paroko Ave Maria Suai, Sebastião Eugenio da Cruz Corea, hatete eleisaun parlamentar besik ona partidu politiku sira komesa lao tama sai aldeia, suku hala’o konsolidasaun, tanba ne’e husu sarani sira tenke kria Paz no estabilidade hodi simu partidu hotu bainhira partidu se deit hakarak hato’o sira nia programa liu husi konsolidasaun bairo ka suku laran.
“Hanesan foin lalais iha Domingu iha misa ne’e hau hato’o ba sarani sira katak agora iha konsolidasaun partidu oi-oin komesa lao tama sai suku, ita tenke simu bainhira sira ba, tanba ita ba hakarak atu rona sira nia programa, maibe ita ba rona tenke hatene katak ita mesak Timor oan, tan ne’e partidu sese deit ita sarani sira simu deit hodi rona buat saida mak sira aprezenta, ne’e duni ita tenke kria ambiente hakmatek iha fatin para eleisaun parlamentar mai ne’e bele lao ho diak” informa Padre Paroko Ave Maria Suai, Sebastião Eugenio da Cruz Corea, ba jornalista sira iha salaun enkontru Igreja Ave Maria Suai, Tersa (21/02).
Amo paroko afirma partidu politiku agora sira mai halo konsolida hodi hein ba kampana eleitoral mai ne’e, tan ne’e nudar amo paroko hakarak hameno hela ba sarani sira atu mantein nafatin paz no estabilidade iha rai Suai, hein katak buat hotu sei la’o ho diak bainhira mantein Paz, serbisu hamutuk kria estabilidade.
“Tanba estabilidade iha maka dezenvolvimentu bele iha, estabilidade iha ita lao ba ne’ebe deit lao livre, estabilidade iha ita hakarak atu hala’o atividade negosiu saida deit bele halo tan ne’e hein katak kampana mai partidu oi-oin mai ita ba rona deit no kria nafatin estabilidade, laos ba rona tiha programa partidu A nian fila mai hodi hatun fali partidu B nian ne’e labele hanesan sarani ba rona to’o ona loron eleisaun ida-idak ba to’o iha sentru votasaun tama ba vota tuir ida-idak nia konsiensia rasik” Amo Paroko dehan.
Amo Paroko haktuir, nudar sarani ko’alia sukat ibun maske natal ruin laiha, maibe tenke hatene katak ema mak ko’alia, ne’e duni ko’alia labele estraga fali ema seluk hodi kria problema, hodi destroi unidade, maibe nudar sarani lia fuan ko’alia atu hametin unidade, tanba ne’e ko’alia sukat.
Amo paroko afirma tuir uma kreda nia haree lider partidu politiku sira iha konsolidasaun ka kampana eleitoral sira insulta malu sarani nia oin ne’e ibun deit tanba atu hodi hadau votus maibe bainhira sira to’o iha kotu hakuak malu no hamnasa ida ne’e mak presiza hatene labele monu ba iha lider sira insulta malu ne’e.
Mao Sebastião hatete tuir lei iha kampana eleitoral atu insulta malu laiha maibe tanba atu manan ema fo votus ba sira nia partidu dalan ida maka hili liu husi insulta malu.
“Iha lider partidu politiku balu mai ho hau ko’alia dehan amo ami sira maka tama iha partidu politik ne’e ohin ami bele dehan metan aban bele dehan mutin, maibe amo sira lae metan, metan to’o mate, mutin ona mutin to’o mate, ami sira ne’e ohin bele dehan A aban bele dehan B tanba ami halo politika atu dada ema hodi hetan votus, ohin ami bele insulta malu aban ami bele hakuak malu” Amo Paroko konta.(Azu)
