.png)
Covalima (RCCT) 03-09-24-Tersa feira ne’e ekipa konjunta husi Falintil Forsa Defeza Timor-Leste (F-FDTL) no Polisia Unidade Patrullamentu Fronteira (UPF) Komapañia Bravo Covalima hala’o patrollu konjunta iha area fronteira ho distansia kilometru 15, hahu husi Postu vilansia We’e Sei to’o Postu Integradu Salele, Postu Administrativu Tilomar, Munisípiu Covalima ne’ebé akompana mos husi jornalista Radio Comunidade Cova Taroman no Suai Post.
Falintil Forsa Defeza Timor-Leste (F-FDTL) no Polisia Unidade Patrullamentu Fronteira (UPF) Komapañia Bravo Covalima hanesan Leão ne’ebé estadu Timor-Leste husik iha rai ladik entre Munisipiu Covalima no Malaka NTT Indonezia hodi daka komunidade sira ne’ebé tenta atu halo movimentasaun no negosiu ilegal iha area fronteira.
Tuir obrsevasaun jornalista sira, forsa rua ne’e la’o ain, tama sai ai laran, mota laran no sa’e foho tun foho, terus ba hamlaha no hamrok hodi devende povu maubere sira ne’ebé hela iha fronteira atu moris hakmatek liu liu prevene movimentasaun ilegal ema no sasan.
Ekipa konjuntu ne’e hahu la’o ain iha tuku 8 dader oras timor leste, ho distansia kilometru 15 ne’ebé hahu husi Postu UPF We’e Sei to’o iha Postu Integradu Salele iha oras tuku 12:15 oras tl.
Alende halo patrumentu hodi evita movimentasaun ilegal ema no sasan, Ekipa forsa konjunta rua ne’e hala’o patrollu ne’e ho objetivu atu asegura seguransa iha fronteira entre Timor-Leste ho Indonezia, iha ambitu vizita Sua Santidade Papa Francisco mai Timor-Leste.
Liu husi patrollu ne’e ekipa konjunta mos konsege identifika fatin ka dalan ne’ebé durante ne’e komunidade sira sempre uzatiliza hodi hala’o atividades ilegal tama no sai iha fronteira entre Covalima no Malaka NTT.
Entretantu ekipa konjuntu ne’e kompostu husi Polisia UPF kompañia Bravo Covalima hamutuk ema na’in-9 no F-FDTL destakadu iha Postu Tilomar hamutuk ema na’in-16 ne’ebé lidera husi komandante Alferis Midar.
Jornalista : Julio Salinas / Alfredo Barreto
Editor : Chamot Nahac
