Covalima (RCCT) 16-06-25-Ensino Basiku Filial (EBF) Sanfuk seidauk iha moru protesaun halo animal sira tama livre no hafoer iha resintu eskola, no mos ema deskuñesidu tesi kotu liña eletrisidade iha koneksaun kontador no kanu be mos ne’ebé durante utiliza hodi fasilita bee no ahi ba eskola.
Kordenadora EBF Sanfuk, Flaviana Filomena, hatete laiha morus protesaun difikuldade profesor sira atu hahu prosesu aprendizajen tarde tanba dader san tenki halo uluk limpeza hodi hamoso foer husi animal hanesan bibi no karaun ne’ebé nakleka iha resinto eskola nian.
“Problema bo’ot ida hasoru konaba bee iha, maibe bee labele mai ona tanba ema tesi kotu manguera iha klaran, difikuldade ida konaba ahi mos hanesan ema tesik kotu tiha meteran, ha’u presija tebes ahi no bee, depois moru laiha, ami nia preokupasaun tanba dadersan ami mai atu hanorin estudante sira, maibe dader tenke hamos uluk laiha bibi nia ten no karau nia ten hotu maka foin kontinua tama ba eskola laran hodi hanorin labarik, sira maibe oras mos la’o daudauk ona, tan ne’e husu ba governu liliu ba Ministeriu Edukasaun atu tau atensaun hodi hare konaba problema ne’ebé durante tinan barak eskola ida ne hasoru” Kordenadora EBF Sanfuk, Flaviana Filomena husu.
Koordenadora Eskola, Flaviana Filomena, relata ona problema hirak ne’e ba Autoridade Covalima liu husi Servisu Munisipal Edukasaun maibe seidauk iha responde.
“Ho problema ida ne’e ha’u hato’o ona ba iha edukasaun maibe sira hatete dehan hein de’it osan eskola nian liliu konaba osan konsesaun eskona nian sai maka lori resolve problema ne’ebé eskola hasoru, maibe to’o agora orsamentu konaba ida ne’e seidauk sai maka to’o agora seidauk hadi’a ne’e” nia dehan.
Enkuantu tuir Kordenadora EBF Wedare Sanfuk, Flaviana Filomena infrma, total estudante iha Eskola Baziku Filial Sanfuk hamotuk ema na’in nen resin ida.
Jornalista : Julio Salinas
Editor : Chamot Nahac
