Covalima (RCCT) 03-09-25-Cruz Vermella Timor Leste (CVTL) atribui ekipamentu salvamentu ba komunidade uma kain 181 iha Aldeia Loro no Uma Klaran, Suku Raimea, Postu Administrativu Zumalai.
Prezidenti Board Interinu CVTL Filial Covalima, Domingos Gravila hatete apoiu ekipamentu alerta sedu ne’ebé oferese ba komunidade sira hanesan pasta prontu ne’ebé kompleta ho mega phone radio (Toa) no solar panel, atu utilija tuir nesesidade hodi ho infroma sedu ba komunidade sira atu salva an wainhira akontese dezastre.
“Ohin CVTL hamutuk ho parseiru ho governu hanesan APC, Autoridade Munisípiu Covalima ita mai distribui ekipamentus ne’ebé alerta sedu, ekipamentus hirak ne’e ita distribui ba sira atu utiliza hanesan bainhira akontese dezastre ruma hodi halo avizu hodi fo informasaun ba iha ita nia komunidade sira atu nune’e sira bele evakua no ba fatin ne’ebé seguru mós ekipamentus sira ne’e katak ita atu fo ba sira atu rai no mós kuidadu didak katak ida ne’e sai hanesan buat ne’ebé importante tebes atu nune’e wainhira ita atu utiliza to’o tempu ne’ebé mak naruk liliu ba iha komunidade sira iha aldeia ne’ebé mak ita fo suporta ekipamentus sira hirak ne’eba” hatete Prezidenti Interinu Cvtl Filial Covalima Domingos de Gravila
Reprejenta Prezidenti Autoridade Munisipiu Covalima, atual Diretór Servisu Munisipal Protesaun Sivil no Jestaun Dezastre Naturais (SMPSJDN), João Martins husu ba CVTL kontinua apoiu ba komunidade ne’ebé presija hetan tulun liu-liu apoiu umanitaria no fasilidade nesesariu ba komunidade sira wainhira afetadu ba dezastre naturais.
“Husu ita bo’ot sira atu bele kontinua tulun komunidade atu nune’e ami nia komunidade sira iha suku raimea tinan tinan labele halerik ba inundasaun hela deit, tanba ami husi KJDM ho APC mai apoiu ne’e apoiu emerjensia deit maibe kuitadu sira nia sasan barak mak lakon, natar sira ne’e estraga, to’os, tanba ida ne’e mak prezensa ita bo’ot sira nian ami orgullu no fo agradese ba ita bo’ot sira nia prezensa. Buat ne’ebé mak ita bo’ot sira fo, ne’e fo benefisiu direita ba komunidade ba ekipamentus hodi nune’e ami nia komunidade sira hetan dezastre karik sira mos bele fo atensaun ba komunidade sira no bele salva sira nia vida” João Martins, dehan.
Cruz Vermella Timor Leste (CVTL) atribui ekipamentu salvamentu ba komunidade uma kain 181 iha Aldeia Loro noUma Klaran, Suku Raimea, Postu Administrativu Zumalai, ne’ebé mai ho pakoke pasta pronto ne’ebé kompleta ho mega phone radio no solar panel ba kada uma kain, hamotuk uma kain 181 iha Aldeia Loro no Uma Klaran, Suku Raimea Postu Administrativu Zumalai, Munisipiu Covalima.
Jornalista : Alfredo Barreto
Editor : Chamot Nahac
