Covalima (RCCT) 02-09-25-Lakleur tan Covalima sei sai uma na’in ba iha eventu Festival Fronteira 2025, ho ida ne’e Autoridade iha Munisipiu Covalima husu ba entidades hotu atu manitein paz no kria amizade hodi simu bainaka sira iha eventu nasional ne’e.
Sekretariu Munisipal Administrasaun no Finansas Munisipiu Covalima Alberto Moniz de Araújo, dehan eventu ne’e atu hametin amizade entre timor oan sira ne’ebé hela iha Timor Leste no Timor Osidental.
“Iha Outobru 2025 ita sei iha serimonia bo’ot ida bele dehan serimonia internasional serimonia Festival Fronteira, tanba ne’e husu ba hotu-hotu atu kria paz iha ita nia rain tanba maluk visiñu Indonezia sei mai hotu hodi halo rekonsiliasaun, karik ita bo’ot sira akompaña iha Oekusi ho Maliana bolu dehan nahe biti bo’ot, ne’e hanesan lasu amizade ida entre ita Timor oan ho Timor Osidental tanba sira la seluk la leet, sira ne’e ita mesak maluk feton no nan deit no maun alin de’it” Sekretariu Munisipal Administrasaun no Finansas Munisipiu Covalima Alberto Moniz de Araújo, dehan lia ne’e hafoin sai inspetor ba sermonia isar bandeira nasional primeiru semana ne’ebé hala’o iha resintu Administrasaun Munisipiu Covalima Segunda (01/09).
Autoridade Munisipal ne’e mos husu lider Arte Marsiais no Arte Ritual sira iha Munisipiu Covalima atu apela ba ida idak nia membru hodi kontribui ba kria paz no unidade durante ambitu Festival Fronteira iha Covalima.
“Husu mos ba parte hotu-hotu liliu ba sira ne’ebé involve iha Arte Marsiais, hanesan konselleiru ba Federasaun Silat Munisipiu Covalima, hanesan mos komisariu Sub KRAM Munisipiu Covalima hakarak apela ba ita hotu iha ne’e bele partilla informasaun ba alin oan sira katak iha tempu badak ita sei realiza Festival bo’ot ida tanba ne’e mai ita hotu fo liman ba malu hodi kria paz no estabilidade iha rai Covalima” nia husu.
Enkuantu tuir informasaun eventu Festival Fronteira 2025 sei akontese iha inisiu fulan Outubru tinan ne’e. No mos sei partisipa mos husi bainaka sira husi nasaun viziñu Indonezia partilarmente provinsia ne’ebé halo fronteira ho timor leste hanesan Malaka, Belu, Kefa no mos Kupang NTT Indonesia.
Jirnalista : Julio Salinas
Editor : Chamot Nahac
