COVALIMA—- Xefe Departamentu Programatiku Saude Munisípiu Covalima, Agapito de Jesus Nunes, hateten Covalima oan afetadu ba moras HIV-SIDA hamutuk ona ema na’in-75, maibe husi numeru ida ne’e iha ema na’in-24 maka lakon ona vida.
“Total moras HIV-SIDA akumulatif agora ita iha ema na’in-75 maka afeta, iha Covalima kazu 75 ne’e kompostu husi mane ema na’in-46 no feto ema na’in-29, agora daudaun ita iha husi total numeru 75 ne’e mate ona ema na’in-24” informa Xefe Departamentu Programatiku Saude Munisípiu Covalima Agapito de Jesus Nunes ba jornalista sira hafoin partisipa iha workshop ne’ebe hala’o husi Ministeriu Saude ba nivel Rejional kona-ba planu mikro nivel sentru saude komunitaria ba Serbisu Munisipiu Aileu, Ainaro, Covalima no Manufahi, ne’ebe hala’o iha Salaun enkontru Eskola Sekundaria Geral Publika Suai, kuarta (12/04).
Xefe Departamentu Programatiku Saude Munisipiu Covalima ne’e dehan fasilidade iha ospital Referal Covalima ladun sufsiente tan ne’e maka pasiente HIV-SIDA hamutuk ema na’in-13 transfere ba nasional hodi halo tratamentu tanba nasional maka fasilidade kompletu.
Nia haktuir agora daudaun pasiente HIV-SIDA ne’ebe hala’o hela tratamentu iha fasilidade saude hamutuk ema na’in-38 ne’e inklui ona sira ne’ebe halo transferensia ba hala’o hela tratamentu iha Dili no Covalima rasik.
Nia esplika iha fulan tolu nia laran hahu husi Janeiru to’o Marsu 2023 serbisu saude Munisípiu Covalima deteta tan sidadaun Covalima oan ema na’in-2 pozitivu kona HIV ne’e kazu foun foin rejista iha tinan ida ne’e nia laran.
Nia dehan husi kazu sira ne’e as liu maka iha Postu Administrativu Suai, tuir Tilomar no Postu Administrativu Maucatar maibe ba postu administrativu 4 seluk laiha.
Xefe Departamentu Programatiku Saude Munisípiu Covalima ne’e haktuir alende rejista kazu HIV-SIDA, serbisu saude Covalima mos rejista moras Tubercloze hamutuk ema na’in-187 kona moras TBC.
“Kona-ba moras Tubercloze ita iha númeru hamutuk ema nai’in-187, maibe iha fulan Janeiru to’o Marsu ita nia profesional saude sira nia serbisu diak tebes salva ita nia komu idade sira ne’ebe deteta tan kazu foun hamutuk ema na’in-73 durante fulan tolu nia laran” nia dehan.(Azu)
