Covalima (RCCT) 26-06-25- Komisaun Nasional Eleisaun (CNE-Sigla Portuguensa) hala’o edukasaun sivika ba Komunidade no lider partidu politiku sira hodi promove eleitor sira atu hatente di’ak liu konaba direitu siviku no partisipa iha prosesu eleitoral ida ne’ebé demokratika no inklusivu, liu liu atu konsilida demokrasia iha eleisaun poder lokal ne’ebé partisipativu.

Nune’e Reprezenta Autoridade Munisipiu Covalima, Jose Manuel Gonçalves, atual Diretor Servisu Munisipal Rekursu Umanu, temi katak previstu ona iha konstituisaun RDTL, no mos fo dalan ona liu husi lei sira ne’ebé governu estabelese ona atu sai baze fundamental hodi implementa poder lokal iha munisipiu sira.

“Konstituisaun RDTL iha artigu 5 ko’alia konaba desentralizasaun no ko’alia konaba poder lokal iha artigu 72. Iha mos lei numeru 11/2009 7 de Outobru kona ba divizaun administrativu iha kapitlu segundu konaba identifikasaun administrativu no iha artigu 4, nune’e mos iha lei artigu 23/2021, 10 Dezembru ko’alia konaba lei poder lokal  no desentralizasaun administrativu nian” dehan Diretór Rekursu Humanu.   

Komisariu CNE Detakadu Ba Munisipiu Aileu no Covalima Elvino Bonaparte do Rego dehan liu husi edukasaun sivika ne’e atu fo kuñesimentu ba partidu politik no komunidade sira atu hasoru eleisaun poder lokal ne’ebé sei akontense iha tinan 2027.

“Edukasaun Sivika ba Partidu Politikus sira no mos ba komunidade sira iha Covalima, Objetivu atu sira hatene konaba ba oinsa atu hasoru eleisaun ba poder lokal iha tinan oin mai. Governu halo preparasaun lubuk, agora tama ona iha espasu ida halo avaliasaun iha 2026, avaliasaun sira ne’e hotu sei halo eleisaun iha 2027. Ho ida ne’e mak husi CNE halo hare akompaña buat sira ne’e hotu, persija fahe informasaun ba lider partidu politukus sira hotu nune’e sira bele prepara an hasoru eleisaun ne’e no saida mak sira atu halo iha sira nia munisipiu depois hetan poder lokal ne’e. Entaun sira prepara atu kandidata an no atu halo saida iha sira nia munisipiu” Komisariu CNE Detakadu Ba Munisipiu Aileu no Covalima Elvino Bonaparte do Rego, dehan.

Tuir CNE nia observasaun ba eleisaun sira ne’ebé liu ona, katak pasa ho susesu maibe partidu politiku sira persija halo preparasaun ida ne’ebé di’ak liu kompente iha eleisaun ba porder lokal no prepara atu lidera munisipiu wainhira hetan fiar husi povu.

Jornalista : Julio Salinas

Editor       : Chamot Nahac