Covalima (RCCT) 17-07-25-Sentru Juventude Covalima (CJC-Sigla Portuguesa) fasilita Edukasaun Sivika hodi hadi’a kualidade Rekursu Umanu, ba Juventude iha Suku Kasabauk, Postu Administrativu Tilomar Munisipiu Covalima.
Diretór Ezekutivu CJC Júlio Ferreira hatete atividade edukasaun sivika ne’e realiza hodi hasa’e koñesimentu foinsa’e sira nian konaba istoria nasional timor leste nian no mos konaba karakter foinsa’e sira nian.
“Liu husi edukasaun sivika ida ne’e hodi garantia kualidade rekursu humanu iha munisipiu covalima ho servisu ida ne’e Sentru persiza halo k’lean liu tan ba ita nia joventude sira espesialmente iha suku kasabauk. Edukasaun sivika ne’e ko’alia konaba karakter juventude nian no atetude siviku ba juventude sira no parte seluk mos ita fo material istoria timor nian no buat lubuk ida ne’ebé mak ita fo ba sira” Diretór Ezekutivu Sentru Juventude Covalima Júlio Ferreira, dehan.
Partisipante Edwin Batista da Silva hatete informasaun ne’ebé sentru juventude Covalima partilla iha liu husi edukasaun sivika ne’e interesante tebes hodi eleva sira nia kuñesimentu ho nune’e foinsa’e ne’e kompremente sei kontinua hatutan informasaun ne’e juven sira seluk iha sosiedade.
“Liu husi formasaun ne’e ami aprende buat barak tebes primeiru mak edukasaun sivika ne’e sira hanorin mai ami joven sira atu hatene kontribui oinsa mak atu partisipasaun no oinsa mak atu hari dame no estabilidade iha ami nia suku no nasaun timor leste, no hanorin ami konaba lei konstituisaun RDTL nian demokrasia, igualdade jeneru” Partisipante Edwin Batista da Silva, hatete.
Atividade edukasaun sivika ba juventude suku kasabauk konaba hodi garante kualidade rekursu umanu iha Munisipiu Covalima ne’ebé koalia konaba karakter foinsa’e nian no istoria nasional timor leste ne’e partisipa husi juventude rua nulu resin lima iha kasabauk durante semana ida hahu segunda ne’e to’o sei termina iha sexta feira semana ne’e.
Jornalista : Alfredo Barreto
Editor : Chamot Nahac
