Covalima (RCCT) 11-1025-Centro Nacional Chega!I.P organiza seminariu ho tema “Rekonsiliasaun hosi Perspetiva Kultural no Justisa Formal iha Kontestu Promosaun Paz no Harii Konfiansa iha Sosiedade. Objetivu hosi seminariu ne’e mak atu esplora no hametin komprensaun kona-ba sinerjia entre mekanizmu kulturál no justisa formál, hodi deskobre mekanizmu rekonsiliasaun ida ne’ebé mak iha abut ne’ebé metin iha matenek lokál, nune’e bele kontribui ba harii paz ne’ebé sustentavel iha Timor-Leste.

Iha Introdusaun, Diretór Ezekutivu Centro Nasional Chega!I.P, Hugo Maria Fernandes destaka importansia husi seminariu no introduz mandatu Centro Chega!I.P ligadu ba implementasaun rekomendasaun sira husi relatoriu Chega! No PMAS liu-liu ba asuntu rekonsiliasaun. Alende ne’e destaka mos servisu sira ne’ebé mak Chega! hala’o ona ho nia progresu sira ba servisu prosesu rekonsiliasaun timoroan nian.

“Alende ne’e, atu reflete kona-ba papél mekanizmu kulturál nian nu’udar instrumentu rekonsiliasaun. Kompara efetividade sira husi instrumentu kulturál no formál nian iha harii konfiansa sosiál. Identifika pontu komún no sinerjia potensiál sira entre kultura no justisa formál hodi apoia pás ne’ebé sustentável. Dezenvolve rekomendasaun akadémika sira hodi hametin polítika sira rekonsiliasaun nian ne’ebé bazeia ba sinerjia entre kultura no justisa formál.” Diretór Ezekutivu Centro Chega!I.P, Hugo Maria Fernandes, dehan.

Oradór ba seminariu ne’e mak hanesan Josh Trindade, Leovirgildo Hornai no Jose Luis Oliveira. Revizaun kritiku mak hanesan, Joaquim Fonseca Russo no Miguel Amaral. Atividade ne’e realiza iha ámbitu Festival Fronteira 2025 ho tema “Interkambiu Kulturál ba Hametin Rekonsiliasaun”, ne’ebé realiza iha Salaun Amboa One, Suai, Covalima.

Reportazen RCCT