COVALIMA (RCCT)-03-11-23–Kinta foin lalais (01/11) Ema Deskoñesidu sobu odamatan loja no na’ok João Ramalho nia sasan iha merkadu suai debos ho folin besik osan dollar amerikanu atus hat, Sasan sira ne’e mak hanesan, kalsa badak ho presu $ 12.00 ema na’ok kuaze lusin 2 resin, faru “kaos” ho presu $ 10.00 lusin 2 resin inklui faru liman naruk fa’an ho presu $ 5.00 ne’e kauze lusin ida resin, nune’e sasan sira ne’ebé lakon konata ba osan hamotuk $ 400.00.
Negosiante João Ramalho konta kronolojia katak iha akontese ne’e nia parte laiha fatin tanba hamotuk ho nia familia ba foho atu kari ai funan ba matebean sira, maibe iha Kinta kalan loron 1 fulan novembru hale’u oras tuku sanulu resin rua, rona informasaun ema deskoñesidu sobu odamatak no no’ak sasan iha nia loja laran.
“Iha dia 1 kalan hotu-hotu konsentra ba iha foho hodi selebra loron finadu, tan ne’e kios ami husik hela ba konsentra iha foho hodi selebra finadu iha foho, entaun iha dia 1 kala ne’e baihira ami simu informasaun husi merkadu Suai iha hale’u oras tuku 12 kalan katak kios ema sobu, iha momentu ne’eba sira konta kronolojia katak bainhira sira tur halimar parte billiard nian ne’eba hetan ema na’in 3 ka 4 ida hanesan sai husi merkadu sorin ne’eba tau roupa iha faru laran, momentu ne’eba subriñu sira haree duni ema hirak ne’e maibe sira la kaer, maibe sira diskonfia duni dehan ema na’ok sasan, entaun subriñu sira ne’e la’o fali husi billiard nian ne’e tama mai merkadu laran to’o iha ha’u nian ne’e hetan odamatan naksobu kadiadu soe hela tun ba rai, depois kavidu sira mos soe hela tun hotu ba rai foi sira kontaktu keda ba ami iha foho” João konta.
Negosiate João seidauk kesar ba parte siguransa atu halo investigasaun, maibe hato’o ona kazu ne’e ba xefe suku Debos bainhira tun ba fatin akontesemenetu hodi halo observasaun ba kazu ema deskonesidu sobu odamatan no na’ok sasan iha keos laran ne’e, sexta (03/11)
“ami foin fila husi foho mai iha horseik lokraik, ne’ebé to’o agora seidauk hato’o ba parte seguransa, maibe so ohin na’i xefe suku maka hakat ona mai iha fatin akontesimentu hodi haree, ne’ebé ami hato’o ona ba nai xefe suku Debos.” Nia dehan.
Nia mos dehan Servisu Jestaun Merkadu bandu Negosiate sira kalan labele toba iha merkadu maibe la koloka siguransa ho asegura sia nia sasan iha loja laran wainhira kalan sira fila ba uma. Tan ne’e Negosiate João husu ba Governu liu husi servisu munisipal jestaun merkadu no turizmu atu koloka siguransa iha merkadu suai, tanba akontese ema deskoñesidu na’ok sasan iha merkadu durante ne’e akontese bebeik.
“iha biban ne’e ami rekomenda ba jestaun merkadu atu koloka seguransa mai iha merkadu atu nue’e asegura netik sasan se bainhira vendedor sira laiha fatin seguransa bele tau matan, tanba durante parte jestaun merkadu la autoriza vendedor sira kalan toba iha merkadu, tenke fila ba toba iha uma dader maka mai loke kios, maibe parte jestanu merkadu mos seidauk koloka seguransa mai merkadu hodi asegura sasan sira ne’e, ne’ebé ema na’ok sasan ne’e la’os foin maka akontese agora mai akontese beibek ona, parte jestaun merkadu seidauk foti asaun ruma konaba asuntu ida ne’e, ami mak vitima sai vitima hela deit, durante ami fo hela deit kontribuisaun ne’e bainhira halo kontribuisaun ba iha igreja no mos ba iha parte estadu nian nudar vendedor sempre kopera sira husu hira hira ami fo hela deit, tan ne’e ami nia rekomendasaun mak tenke monta seguransa iha merkadu” nia husu.
wainhira halo observasaun iha fatin akonsementu, Xefe Suku Debos, Agustinho da Silva, husu mos ba parte governu liliu ba iha jestaun merkadu tenke kria planu hodi monta seguransa iha merkadu nune’e negosiante sira labele lakon sira nia sasan iha keos laran wainhira kalan fila ba uma. Xefe Suku Debos mos rekonese antese iha merkadu suai debos iha pessoal siguransa maibe dadaun ne’e laiha ona, nune’e nia sei esforsu koalia ho xefe merkadu no servisu munisipal jestaun merkadu atu koloka fali siguransa iha merkadu suai hodi asegura vendedor sira nia sasan iha tempu kalan.
“Jestaun merkadu ne’e nia tenke kria seguransa ruma, se ema na’in lakohi haruka toba iha kios jestaun merkadu tenke tau seguransa, ne’ebé kuandu na’in laiha mos seguransa iha atu bele tau matan ba sasan sira iha merkadu ne’e, xefe merkadu mos tenke iha inisiativa rasik katak rendimentu ne’ebé hetan husi merkadu tenke hodi monta mos seguransa iha merkadu, tanba uluk seguransa iha maibe agora laiha, maibe ha’u sei buka meus hodi ko’alia xefe merkadu no jestaun merkadu hodi tau planu hamutuk oinsa atu bele tau mos seguransa iha merkadu” Xefe Suku Debos dehan.
Entertantu RCCT seidauk halo konfirmasaun ho parte xefe merkadu no Servisu Munisipal Jestaun Merkadu no Turizmu relasiona ho loron feridu.
Jornalista :Julio Salinas
