Covalima (RCCT) 01-09-25-Relasiona pasiente ida ne’ebé deskonfia afeita ba moras rabies halai sai husi Ospital Referal Suai halo autoridade iha Munisipiu Covalima preokupa ho mediku sira nia servisu no atendimentu ba ema moras.
Tan ne’e Sekretariu Munisipal Administrasaun no Finansas Munisipiu Covalima Alberto Moniz de Araújo, lamenta ho servisu profesional saude sira nian iha ospital referel suai.
“asuntu ida seluk nafatin ho surtu rabies, hanesan ita bo’ot sira akompaña iha loron ida ka rua liu ba foin lalais, ita nia pasiente ida konsege halai sai, tan ne’e husu ba parte mediku sira ita bo’ot sira nia servisu to’o ona iha ne’ebé? pasiente ne’e bele kabur fali husi hospital. Konsege kaer toman iha kraik agora nia (pasiente) ne’e matebian ona” dehan Sekretariu Munisipal Administrasaun no Finansas Munisipiu Covalima Alberto Moniz de Araújo, dehan lia ne’e wainhira sai inspetor ba serimonia hasa’e bandeira nasional primeiru semana fulan setembru, ne’ebé realiza iha resinto administrasaun Munisipiu Covalim. (01/09)
Autoridade Munisipal ne’e kontinua husi ba entidade hotu iha Covalima atu servisu hamotuk hodi halo kombate ba moras rabies.
“Tanba ne’e husu ba parte hotu liliu ba saude no veterinaria sira husi agrikultura nian no husi parte hotu atu servisu hamutuk hodi kombate rabies, atu nune’e labele mosu tan vitima ba moras ida ne’e” nia dehan
Enkuantu tuir dadus ne’ebe Servisu Munisipal Saude Covalima rejista hahu husi fulan Janeiru to’o Setembru 2025 ne’e iha sidadaun Covalima oan hamutuk na’in-488 maka asu tata, no husi numeru ida ne’e ema na’in-9 maka lakon ona vida tanba afeita ba moras rabies.
Jornalista : Julio Salinas
Editor : Chamot Nahac
