Covalima (RCCT) 18-08-25-Hahu husi fulan jullu to’o augustu 2025, Autoridade Munisipiu Covalima apoiu ona fos hamotuk saka 100, super mie kaixa 300 no nesesidade bazika sira seluk ba grupu tarjeitu hamotuk nen (6) no mos ba familia vuneravel sira hodi hakman todan iha moris uma kain nian.
Diretór Servisu Munisipal Protesaun Sivil ni Jestaun Dezastre Naturais (SMPSJDN) Munisipiu Covalima, João Martins, dehan autoridade covalima la’os ajuda deit aihan maibe fo tulun mos fasilidade tein nian.
“”Ami husi autoridade Munisipiu Covalima mai haree ita nia familia ne’ebé maka kbit naton ema bolu dehan familas vuneravel ne’eb’e fo apoiu nesesidade bazika hanesan foos, supermi no biskuit inklui sasan dapur nian balu fo ba familia ne’ebé presija ita autoridade nia tulun atu nune’e sira mos bele aguenta netik ba sira nia moris loron ida ka rua nian” informa Diretór Servisu Munisipal Protesaun Sivil ni Jestaun Dezastre Naturais (SMPSJDN) Munisipiu Covalima, João Martins.
Fatin hanesan Administrador Postu Administrativu (APA) Suai, Ildefonso Maria Amaral, relata molok ne’e nia parte halo vizita ba ninia komuniade hodi idetifika kondisaun, nune’e rekomenda ba autoridade munisipiu covalima, hodi fo ajuda nesesidade bazika.
“Liu husi asaun ida ne’e ha’u rasik la’o tun ba iha aldeia no suku sira konsege identifika hetan duni familia vuneravel ida ne’e kategoria mos difisiensia, maka hanesan ita nia aman ka tiun ne’e hanesan xefe familia moris nudar difisiensia. Iha momentu ne’eba ha’u mai identifika katuas ho kondisaun ida ne’ebé grave, ho ida ne’e ha’u husu ajuda ba iha Diretor Servisu Munisipal Protesaun Sivil ni Jestaun Dezastre Naturais para oinsa atu ajuda netik ha’u nia komunidade ida ne’e hela iha Bairo Rompe, Suku Debos, Postu Administrativu Suai, nune’e bele hetan netik ai-han tanba ho kondisaun ida ne’e ha’u mos sente triste katuas labele ona atu buka servisu hodi sustenta nia familia tanba ho kondisaun ida moras” nia dehan.
Benefisiariu ba apoiu husi Autoridade Munisipiu Covalima, ne’e maka madre sira iha salele no fohorem, santa rosa suai no Maukatar, inklui familia vulneravel balu iha Covalima. Engkuantu Apoiu hirak ne’e kompostu husi fos, supermi, Sadina, biskuit inklui fasilidade tein nian.
Jornalista : Julio Salinas
Editor : Chamot Nahac
