Covalima(RCCT) 01-09-25-Tuir dadus ne’ebé Servisu Munisipal Saude Covalima rejista iha tinan 2025 nia laran, iha sidadaun hamutuk na’in-488 maka asu tata, husi numeru ne’e ema na’in-9 maka lakon ona vida. Na’in 4 mate ho suspeitu rabies no na’in 5 seluk mate ho konfirmadu ba positivu rabies.
Xefe Dapartamentu Dezenvolvimentu Jestaun Rede Munisipal Postu no Sentru, Teofilo Amaral, relata husi ema na’in 488 ne’ebé asu tata, iha deit ema na’in 357 maka hetan kedas vasinasaun anti rabies.
“Dadus ne’ebé liga ba kazu rabies ohin loron ita hotu hatene kazu ne’e agora daudaun sa’e maka’as iha ita nia Munisipiu Covalima, tanba ne’e atu dehan deit katak hahu inisiu fulan Janeiru ate adata ita iha total kazu asu tata ema hamutuk na’in- 488, husi total 488 ne’e ema na’in-357 maka hetan kedas vasinasaun anti rabies ne’e husi parte saude ninian, maibe restu husi ida ne’e la mai halo vasina tanba dala ruma sira rasik maka laiha konsiensia atu mai simu vasina, maibe agora daudaun servisu munisipal saude esforsu no buka meus ona oinsa atu bele hatene hirak ne’ebé la simu vasina liu husi atividade ida katak atu buka tuir ema ida ne’ebé asu tata la simu vasina, ho ida ne’e mos atu dehan deit katak ita Covalima agora daudaun mate ona ema na’in-9, mate ho suspeitu rabies ne’e iha ema na’in-4 no mate ho konfirmadu ba positivu rabies iha ema na’in-5” informa Xefe Dapartamentu Dezenvolvimentu Jestaun Rede Munisipal Postu no Sentru, Teofilo Amaral.
Teofilo Amaral, subliña ho numeru kazu rabies as iha Covalima, Servisu Munisipal Saude instala ona ekipa task force, fo orientasaun ba sentru saude sira hotu atu toma atensaun hodi buka tuir komunidade sira ne’ebé hetan tatan husi maibe seidauk simu vasina.
“Ami instala ekipa task force ba internal servisu munisipal saude rasik no mobiliza direita husi Diretór Servisu Munisipal, xefe departamentu rua no orientasaun ne’e ami hato’o ona ba to’o iha sentru saude-7 ne’ebé ejiste iha Munisipiu Covalima, tanba ida ne’e maka ami orienta kada sentru saude toma atensaun ba ita nia komunidade sira ne’ebé maka la hetan vasina bainhira asu tata, ho ida ne’e ekipa sentru saude sira ba to’o iha postu saude sira hodi buka tuir ita nia komunidade sira ne’ebé la hetan vasina bainhira asu tata” nia dehan.
Xefe Dapartamentu Dezenvolvimentu Jestaun Rede Munisipal Postu no Sentru, Teofilo Amaral, informa katak, sidadaun sira ne’ebé mate ho suspeitu no positivu ba kazu rabies ne’e barak liu mai husi Postu Administrativu Tilomar, tuir Suai no Maukatar, tanba ne’e nia husu ba komunidade tomak atu kopera ho saude Covalima hodi prevene an liu husi moras rabies.
Jornalista : Julio Salinas
Editor : Chamot Nahac
