Covalima (RCCT) 25-10-23—Hafoin Ajensia Fiskalizasaun Munisipiu Covalima tun ndireta hodi halo fikalizasau iha terenu ba implementasaun Programa Mão de Obra Postu Administrativu (PMOPA), konsege identifika implementasaun ba PMOPA iha Postu Administrativu (PA) 7 maioria la’o la to’o loron 20.

Diretor Ajensia Fiskalizasaun Munisipiu Covalima Miguel Armada hatete PMOPA iha PA 7, implementa loron servisu maioria la’o la to’o loron 20.

“PMOPA kuaze iha Postu Administrativu hotu-hotu implementasaun servisu la to’o loron 20 iha Q1-Q2 ami ko’alia ona to’o Q3 mos nafatin deit, toos demais” informa Diretor Ajensia Fiskalizasaun Munisipiu Covalima Miguel Armada iha nia intervensaun wainhira partisipa iha reuniaun konsellu Munisipal ne’ebé hala’o iha Salaun enkontru Administrasaun Munisipiu Covalima Kuarta ne’e.

Armada haktuir hala’o fiskalizasaun iha Postu Administrativu Fohorem deteta, uza osan PMOPA nian hodi konstrui fali sintina no pinta edifisiu Administrasaun Postu, iha Tilomar, utilizasaun transporte seim karta kontratu maibe sira indika ba malu deit, nune’e mos iha Fatumea, utiliza kareta tuir lolos selu $ 20,00 kada Ret maibe iha relatoriu mai ho montante osab, selu $ 75, 00 kada loron.

“Liu husi fiskalizaun iha Postu Administrativu Fohorem uza osan PMOPA nian hodi konstrui fali sintina, hadi’a portaun no pinta uma administrasaun, ne’e deteta, realidade no faktus ne’ebé maka iha, iha postu Tilomar akizasaun atu uza transporte la halo karta ka buat ruma maibe indika deit, ne’e sala jalur la tuir gia, nune’e mos ba postu Fatumea konaba implementasaun PMOPA nian uza kareta 2 ba Q1-Q2 kontratu kada loron tula ret 15, kada ret selu osan ho montante $ 20 maibe iha relatoriu osan ho montante $ 75 kada loron” nia dehan.

Iha reuniaun Konsellu Munisipal ne’e Diretor Ajensia Fiskalizasaun Munisipiu Covalima Miguel Armada hato’o mos preokupasaun ne’ebé durante hasoru iha terenu wainhira halo fiskalizasaun, liu liu konaba problema transporte.

“Obstaklu ne’ebé ami hasoru atu hodi hala’o ami nia servisu fiskalizasaun iha terenu, difikulta ami mak transporte, dala ruma ami atu ba halo fiskalizasaun iha eskola sira liliu konaba programa merenda eskolar nian ba tarde no labarik sira fila hotu ona ba uma tanba kareta laiha ba ami bainhira atu sai dader ba halo fiskalizasaun iha, tanba ne’e husu kareta tanba Covalima mos area luan” nia dehan

Entertantu Diretor Ajensia Fiskalizasaun Munisipiu Covalima Miguel Armada, rekomenda, iha futuru atu koloka eis administrador postu sira iha Ajensia fiskalizasaun munisipal nune’e hodi fiskaliza no halo auditoria ba kargu diresaun sira ho di’ak.

Jornalista : Julio Salinas

Editor       : Chamot Nahac