Covalima (RCCT) 23-04-23, Sekretaria Jeral Partidu FRETILIN, Mari Alkatiri, hatete laiha unidade nasional maka sei laiha dezenvolvimentu ne’e maka liu tiha tinan 20 resin progresu laiha.
“Laiha unidade nasional, laiha dezenvolvimentu, laiha progresu ne’e maka ita liu tiha tinan 20 resin ona progresu laiha dezenvolvimentu mos laiha, povu halerik nafatin” deklara Sekretariu Jeral Partidu FRETILIN, Mari Alkatiri ba militantes no simpatizante sira iha kampaña eleitoral datoluk iha Kampu Ladi, Kamanasa, Suai, domingu (23/04).
Alkatiri dehan laiha dezenvolvimentu maka povu halerik nafatin, tanba ukun kontra malu, diskrimina malu.
“Unidade progresu maka bele hametin ita nia hanoin, hanetin ita nia hakarak, atu ita bele komprende didiak prosesu tomak, hanoi nafatin ba kotuk maibe tenke iha vizaun atu hateke no lao ba oin ne’e maka pontu primeiru” informa Alkatiri.
Nia afirma kona-ba pontu segundu maka halo dezenvolvimentu ekonomia ida atu fo dignidade ba ema hotu tenke iha direitu atu moris ho dignu, atu moris ho kondisaun ida atu bele haburas sira nia vida, hanaruk sira nia vida.
Haburas no hanaruk ekonomia familia nian, hanaruk ekonomia komunidade no hanaruk ekonomia povu Timor-Leste nian.
Tenke iha juventude ida iha dinamiku no produtivu, sidadaun hotu-hotu tenke iha dinamiku no produtividade signifika serbisu, para atu serbisu tenke iha kapasidade, tenke iha sistema edukasaun ida ne’ebe diak ne’e ba juventude.
Ekonomia dignu signifika hotu-hotu partisipa iha dezenvolvimentu nune’e hotu-hotu bele hetan ninia benefiaiu, tenke iha kapasidade hakbi’it poder buibere sira nian.
Buibere sira tenke partisipa ba prosesu dezenvolvimentu, feto sira labele hela deit iha uma, maibe sira iha kapasidade, sira iha esperensia, sira iha matenek, sira tenke hetan matenek liu tan para hodi partisipa iha prosesu tomak ne’e objetivu Sagradu dezenvolvimentu FRETILIN nian.
“Maibe saida maka ita tenke halo, ita tenke harii sosiedade ida nakonu ho Solidariedade, nakonu ho fraternidade humana ita hotu-hotu maromak nia oan, buras ho pas, estabilidade no justisa” afirma Alkatiri.
Koodenador Partidu FRETILIN Munisípiu Covalima, Fransisco de Andrade, hatete FRETILIN manan nanis ona tanba iha ona kadeira 36.
“Kamarada sira ita manan ka lae, klaru ita manan, maibe oras ne’e daudaun mos ita manan tiha ona, tanba ita oha kadeira 36 ne’e iha nanis ona, agora ita esforsu tan oinsa buka manan boot liu tan” informa Andrade.
Kordenador haktuir vota ba FRETILIN, vota ba imi nia futuru, vota ba FRETILIN sei lori naroman na povu Timor-Leste.(JS)
