Covalima (RCCT) 13-05-21 Tuir observasaun Jornalísta RCCT iha Merkado Suai hatudu, maske númeru positivu ba Covid-19 ne’e aumenta, maibe aktividade iha merkadu Suai sei loke nafatin ba vendedor sira, hodi halo aktividade negosio, maibe laiha ona Fasilidade fase liman nian nebe maka uluk tau iha Merkadu ne’e.
Tuir regras Organizasaun Mundial Saúde (OMS) katak, atu prevene Corona Virus liu husi uja mascara no fase liman bebeik inklui halo distancia social mínimu metro ida ka liu.
Maibe Vendedor no komprador sira iha Merkado Suai difisil maioria mak la kumpri lala’ok prevensaun Covid-19 liu liu atu fase liman ho sabaun iha fatin Publiku hanesan merkadu Suai, tanba la iha ona Fasilidade fase liman nian iha fatin nebe mak konsidera fatin halibur ema barak.
Xefe Merkadu Suai Jaime Amaral informa, nia parte la iha konhesimento kona ba se maka foti fasilidade fase liman nian (Be Tanke) nebe maka uluk tau iha Merkado Suai, tanba ne’e nia husu ba parte kompotente atu tau hikas Ekipamentos prevensaun iha Merkadu Suai tanba kada loron ema barak maka halibur malu iha fatin refere.
“Tanki be nian nebe maka uluk tau iha merkado ne’e, agora dadaun la iha ona, nebe ha’u mos la hatene, se maka foti, depois ema ida foti ne’e mos la hatete tan, tanba ne’e ha’u husu nafatin se maka responsavel ba buat hirak ne’e, tenke tau fila fali be’e tanki ne’e, tanba merkadu ne’e loron ba loron ema barak maka halibur malu, entaun oinsa maka bele tuir regras saude nian ” Dehan Xefe Merkadu Suai liu husi via telefone ba RCCT Quarta Feira (13-05)
Enkuanto Administrador Posto Suai Laurentino de Yesus liu husi via telefone haktuir, hanesan autoridade lokal nia ko’alia bebeik konaba asunto ne’e, maibe nia dehan SIJK-Covalima maka bele hatun ordem, oinsa bele tau fali Ekípamentus prevensaun nia iha fatin Publiku hanesan iha Merkadu Suai.
“ Kazu positivu nebe maka aumenta bebeik iha Municipio Covalima, Ami maka Autoridade Lokal ne’e ami ko’alia bebeik kona ba ida ne’e, maibe dala ruma husi SIJK maka tenke hatun ordem ida, para oinsa Vendedor ho komprador sira iha Merkadu Suai ne’e bele halo prevensaun liu husi fase liman bebeik ” dehan Administrado Postu Administrativu Suai Laurentino de Yesus ba RCCT Via telefone.
Entertanto relasiona ho asunto ne’e, Jornalista RCCT seidauk halo konfirmasaun lolos ho parte kompotente, tanba okupado ho loron ferias.
Jornalísta : Tynho Gusmão
Edítor : Chamot Nahac
