COVALIMA—-Administrador Munisipiu Covalima, Francisco de Andrade, hatete iha lansamentu distribuisaun kalen ba benefisariu Uma Naroman ba Povu (UNP) agradese ba oitavu governu ne’ebe lidera husi Primeiru Ministru Taur Matan Ruak ne’ebe hili ona programa refere hodia povu nia moris, tanba ne’e husu ba povu atu nafatin konfiansa votus nafatin iha eleisaun parlamentar tuir mai, atu bele kontinua programa hirak ne’e.
“Iha biban ida ne’e hau hakarak hatete loloos ba ita hotu iha fatin ida ne’e, katak oitavu governu maka hatu’ur loloos povu nia moris, povu nia sentimentu tanba ne’e mak nia halo liu husi dezenvolvimentu ba iha aldeia no suku sira hotu, tan ne’e mak hau husu ba ita boot sira karik ekontese eleisaun parlamentar tuir mai labele haluha governu ida ne’e, hili nafatin oitavu governu ida ne’e” deklara Administrador Munisipiu Covalima iha nia diskursu hafoin halo lansamentu distribuisaun kalen ba benefisariu Uma Naroman ba Povu (UNP) plus B ba komunidade suku 5 iha postu administrativu Suai, Kinta (02/02).
Administrador dehan labele mai sosa deit votus to’o iha ne’eba ukun tiha dehan governu ida ne’e la halo buat ida, kuadu oitavu governu halo sira dehan katak sira mak halo fali.
Tanba ne’e dala ida tan husu ba xefe suku sira tenke atende no tenke intende katak oitavu governu nia programa mak agora daudaun halo ne’e, tan ne’e atu hetan apoiu ne’e ba bebeik labele haluha vota ba oitavu governu ida ne’e hodi kontinuasaun ninia programa ida ne’e ba nafatin.
Administrador louva ba oitavu governu konstituisional ne’ebe lidera husi General Taur Matan Ruak ne’ebe hatene loloos saida maka povu nia presiza.
Vise Ministru Administrasaun Estatal, Lino de Jesus Torrezão, hatete agora daudaun atu tama ona ba iha tinan politik nian tanba ne’e husu komunidade sira nia konsiensia rasik aban bain rua imi fo obrigadu ne’e to’o iha ne’ebe ida ne’e mak presiza hato’o.
“Agora ita atu tama ba eleisaun parlamentar, tanba ne’e hau hakarak husu imi nia konsiensia rasik masaban bain rua imi atu fo obrigadu ne’e to’o iha ne’ebe, ida ne’e mak presiza hato’o, ita ema moris ne’e tenke ser agradese ba malu” nia dehan
Vise MAE haktuir uluk governu anterior sira mos halo, laos la dehan la halo lae sira mos halo, maibe halo uma.ida ne’ebe ema barak maka lakohi hela ba, ema balu hela ba mak hanesan Uma MDGs, maibe agora iha oitavu governu nia programa tau fali uma naroman ba povu.
Nia dehan, uma naroman ba povu ne’e programa oitavu governu nian ne’ebe labele tau fali hena ho koor oi-oin iha uma nia leten mak ne’e, labele dehan fali koor ida ne’eba nian ne’ebe programa mak ne’e nusa iha tinan 2008 halo hanesan ne’e.
Maibe foin iha oitavu governu ida ne’e viabiluzadu husi partidu FRETILIN maka foin halo planu uma naroman ba povu ne’e ba hatu’ur duni iha povu sira nia rai rasik, ida ne’e sei dauk to’o maibe planu sei harii tan ba povu uma naroman ba povu plus A ho Plus B, xefe suku sira mos bele hetan uma refere maibe sei tau uluk prióridade ba komunidade sira (Azu)
