Covalima (RCCT), 28 Outubru 2026 — Gropu Vitória ba Moris Di’ak husi Suku Maudemu, Postu Administrativu Tilomar manán fatin dahuluk iha kompetisaun kulinária ne’ebé foka ba transformasaun produtu lokál ba ai-han modernu, nu’udar parte husi selebrasaun Loron Mundial Ai-han ho tema nasionál “Investe iha Inovasaun, Garante Seguransa Ai-han no Nutrisaun”.
Iha kompetisaun ne’e, gropu hamutuk hitu partisipa hodi aprezenta kreatividade no kapasidade atu transforma produtu lokál sai ai-han modernu, ho objetivu atu promove utilizasaun rekursu lokál no fó atensaun ba nutrisaun.
Rezultadu kompetisaun hatudu katak Gropu Vitória ba Moris Di’ak hetan fatin dahuluk, tuirmai Gropu Fatuk Laran iha fatin daruak, no Gropu Roman ba Mudansa iha fatin datoluk. Gropu Hadomi Nutrisaun hetan fatin dahaat, enkuantu Gropu Laloran Fronteira hetan fatin dalimak.
Produtu lokál sira ne’ebé partisipante utiliza inklui hudi, apál no pastaun, ne’ebé transforma ba produtu ai-han modernu, inklui krimi (ice cream). Inovasaun ida-ne’e hatudu esforsu husi grupu sira atu uza produtu lokál ho maneira kreativa, hodi kria variedade ai-han ne’ebé bele atrai konsumidór.
Gropu hitu ne’ebé partisipa iha kompetisaun ne’e mak Vitória ba Moris Di’ak, Fatuk Laran, Roman ba Mudansa, Hadomi Nutrisaun, Laloran Fronteira, Haburas Nutrisaun no Hadomi Ai-han Lokál.
Xefe ekipa juri, Rui Amaral, esplika katak ekipa juri halo avaliasaun ba kada gropu tuir kritériu sira ne’ebé estabelese ona. Kritériu avaliasaun inklui ijiene, utilizasaun produtu lokál, nutrisaun no inkluzaun jéneru.
“Ami, ekipa juri, ida-idak fó pontu bazeia ba regra no kritériu ne’ebé estabelese ona, hodi haree ba ijiene, produtu lokál, nutrisaun no seluk tan. Hafoin, ami halibur pontu hotu-hotu atu determina rezultadu”, Rui Amaral hatete.
Bazeia ba rezultadu avaliasaun ne’e, komisaun organizadora entrega premiu osan ba grupu sira ne’ebé hetan klasifikasaun. Vensedór dahuluk simu US$ 200, vensedór daruak simu US$ 150, vensedór datoluk simu US$ 100, vensedór dahaat simu US$ 80, no vensedór dalimak simu US$ 60.
Aleinde premiu ba grupu sira ne’ebé hetan klasifikasaun, komisaun organizadora mós fó apoiu osan ba grupu rua ne’ebé la tama iha lista vensedór nian, mak Haburas Nutrisaun no Hadomi Ai-han Lokál. Kada grupu simu apoiu osan US$ 60.
Kompetisaun kulinária ne’e sai oportunidade ida ba grupu sira atu hatudu inovasaun iha prosesu transformasaun produtu lokál, no mós atu promove importánsia seguransa ai-han, nutrisaun no valorizasaun produtu lokál.
Jornalista: J. Correia
Editór: Paul Mandeu
