Covalima (RCCT), 21 Outubru 2026 — Grupu feto “Vitória ba Moris Di’ak” hetan 1.º lugar iha kompetisaun kulinária ne’ebé organiza iha ámbitu komemorasaun Loron Mundial Feto Rurál ba dala XIX, iha Munisípiu Covalima, ho prémia osan US$ 200.
Kompetisaun kulinária ne’e hala’o iha MAPPF Covalima, ho partisipasaun husi grupu feto no feto potensial sira iha Munisípiu Covalima, nu’udar parte ida husi atividade komemorativa ne’ebé objetivu atu valoriza kapasidade no kontribuisaun feto rurál sira-nian.
Iha kompetisaun ne’e, grupu feto haat mak partisipa, mak hanesan:
- Roman ba Mudansa;
- Vitória ba Moris Di’ak;
- Laloran Fronteira; no
- Hadomi Nutrisaun.
Iha rezultadu kompetisaun, Grupu Vitória ba Moris Di’ak hetan 1.º lugar ho prémia US$ 200, tuirmai Grupu Laloran Fronteira ne’ebé hetan 2.º lugar ho US$ 150. Grupu Hadomi Nutrisaun hetan 3.º lugar ho US$ 100, enkuantu Grupu Roman ba Mudansa hetan 4.º lugar ho US$ 80.
Komemorasaun Loron Mundial Feto Rurál ba dala XIX ne’e sai oportunidade importante atu rekoñese no valoriza kontribuisaun feto rurál sira-nian iha dezenvolvimentu família, komunidade no nasaun, liuliu iha área agrikultura, produsaun ai-han no ekonomia família.
Feto rurál sira iha papél importante iha atividade ekonómika, liuhusi servisu to’os, hakiak animál no fa’an produtu agríkola iha merkadu. Atividade hirak-ne’e ajuda sustenta ekonomia família no garante disponibilidade ai-han ba komunidade.
Iha kontestu ne’e, presiza kontinua haforsa asesu feto rurál sira-nian ba apoiu governu, formasaun, rekursu produtivu, merkadu no oportunidade ekonómika, atu sira bele hadi’a sira-nia kondisaun moris no kontribui ba dezenvolvimentu sustentável.
Aleinde ne’e, partisipasaun feto rurál sira iha prosesu foti desizaun iha família no komunidade mós importante atu promove igualdade oportunidade no haforsa sira-nia papél iha dezenvolvimentu.
Liuhusi atividade komemorativa ne’e, espera katak instituisaun relevante, organizasaun sosiedade sivíl no komunidade bele kontinua servisu hamutuk atu fó atensaun ba nesesidade feto rurál sira-nian no promove dezenvolvimentu área rurál.
Jornalista: Paul Mandeu
