Covalima (RCCT), 16 Outubru 2026 — Autoridade Munisipál Covalima, hamutuk ho Autoridade Protesaun Sivíl (APC), fó apoiu emerjénsia ba família Joviana de Fátima José, ne’ebé nia uma hetan estragu totál tanba inséndiu iha Aldeia Asurai, Suku Debos, Postu Administrativu Suai, Munisípiu Covalima, iha Sesta-feira (16/10).
Apoiu emerjénsia ne’e inklui foos kilograma 25, saku ida, supermie kaixa ida, mina-te’in, biti, balde, basia, deho kaixa ida, xaa, spónja no nesesidade bázika seluk.
Komandante APC Munisípiu Covalima, Celestino Afonso Ferreira, hateten katak APC, hamutuk ho Autoridade Munisipál Covalima liuhusi Servisu Munisipál Jestaun Risku Dezastre Naturál, fó apoiu emerjénsia ba família vítima inséndiu ne’e.
Nia esplika katak nia simu informasaun kona-ba inséndiu ne’e iha kalan, tuku 22:30. Bainhira haree ahi sai maka’as, nia uluk hanoin katak ema sunu lixu. Maibé, depois nia kontaktu diretamente komandante bombeiru atu orienta ekipa bombeiru sira ba fatin akontesimentu hodi hamate ahi.
“Ha’u simu informasaun iha kalan tuku 10:30. Ha’u haree ahi sai maka’as. Ha’u hanoin ema sunu lixu, maibé la’ós. Ho nune’e, ha’u kontaktu diretamente komandante bombeiru hodi orienta korpu bombeiru sira atu hamate ahi. Tanba ne’e, ohin ita fó apoiu emerjénsia, ai-han no nesesidade seluk ba família vítima inséndiu,” nia hateten.
Celestino Afonso Ferreira mós esplika katak, kona-ba apoiu material ba prosesu rekoperasaun, Diresaun Rekoperasaun rekolla ona dadus no sei submete ba nivel nasionál atu hein desizaun. Família vítima ne’e tama iha kritériu estragu totál.
Iha parte seluk, vítima inséndiu, Joviana de Fátima José, konta katak nia la hela iha uma bainhira inséndiu akontese, tanba nia hela toba iha uma nia apá nian. Tanba ne’e, nia la hatene kauza loos husi inséndiu ne’e.
“Ha’u la hatene kauza husi inséndiu tanba ha’u la toba iha uma, maibé toba iha ha’u nia apá nia uma. Bainhira ha’u mai iha uma, ahi han mutuk ona uma. Nune’e, ami nia sasán iha uma la konsege salva, no osan US$ 200 ahi han mutuk hotu,” nia konta.
Joviana de Fátima José mós hateten katak dokumentu diploma no dokumentu importante sira seluk rai iha uma nia apá nian. Tanba ne’e, dokumentu sira ne’e la hetan estragu husi inséndiu.
To’o agora, Joviana de Fátima José hamutuk ho nia oan feto no oan mane sei hela temporariamente iha uma nia apá nian, enkuantu hein prosesu atu harii fali sira-nia uma.
Jornalista: J. Correia
Editór: Paul Mandeu
