Covalima (RCCT), 15 Outubru 2026 — Diretór Eskola Sekundária Jerál Públika (ESGP) Suai, Fernando Ferreira, husu ba estudante finalista sira atu kontinua estuda no kuidadu saúde, hodi prepara an ba Ezame Nasionál no Ezame Lokál ne’ebé sei hala’o husi loron 19 to’o 26 Outubru 2026.
Fernando Ferreira hateten katak ezame hirak-ne’e sai etapa importante ida ba estudante finalista sira, tanba hafoin remata estudu iha ensinu sekundáriu, sira sei iha oportunidade atu kontinua estudu ba nivel universitáriu.
“Ha’u nia mensajen ba ha’u nia oan estudante sira hotu katak ida-ne’e mak ezame ikus liu iha eskola ida-ne’e hodi hakat ba nivel universitáriu. Mensajen ba sira mak ne’e, fila ba uma tenke estuda, kuidadu an para tuir ezame iha loron Segunda mai, bazeia ba kalendáriu Edukasaun katak Ezame Nasionál no Ezame Lokál ne’ebé sei hala’o iha loron 19 to’o loron 26 Outubru 2026,” Fernando Ferreira hateten.
Tuir dadus ne’ebé disponivel, estudante finalista sira ne’ebé sei tuir ezame hamutuk 617, ho distribuisaun hanesan tuir mai:
- ESGP Suai: estudante finalista 474;
- ESGP Filial Salele: estudante finalista 120;
- ESGP Filial Fatumea: estudante finalista 23.
Ho nune’e, estudante finalista sira husi Ensinu Sekundaria Geral Publika tolu ne’e sei tuir ezame ho objetivu atu kompleta sira-nia estudu sekundáriu no kontinua ba nivel edukasaun tuirmai.
Jornalista: J. Correia
Editor: Paul Mandeu
