Covalima (RCCT), 10 Outubru 2026 — Kompetisaun futeból juvenil Sub-14, AMAHORO Cup Rotativu ba dala tolu, remata ona iha loron 10 Outubru 2026, iha Kampu Futeból Salele, Postu Administrativu Tilomar, Munisípiu Covalima. Kompetisaun ne’e hahú iha loron 1 Outubru 2026, ho partisipasaun husi klube hamutuk 10.
Iha kompetisaun ne’e, FC Unidade Central Salele okupa fatin primeiru, tuirmai FC Ai Taman iha fatin segundu, no FC Ain Tahu iha fatin terseiru.
FC Ain Tahu hetan fatin terseiru hafoin manán FC Fatuk Hun ho rezultadu 1–0. Enkuantu ne’e, FC Ai Taman okupa fatin segundu hafoin lakon iha final hasoru FC EBC Salele ho rezultadu 2–1.
Xefe Komisaun Organizadór, José Quintão Amaral, hateten katak eventu desportivu ne’e hetan apoiu husi Asosiasaun AMAHORO no MIRAI SAT, ho objetivu atu promove dezenvolvimentu talentu iha área desportu no kontribui ba moris saudável liuhusi ambiente ne’ebé moos.
“Ohin lokraik, loron 10 Outubru 2026, ita taka ona AMAHORO Cup Rotativu ba dala tolu iha Kampu Futeból Salele. Atividade ne’e lao ho di’ak tebes tanba ita halo koordenasaun ho lideransa komunitária, autoridade lokál, forsa seguransa no ofisiál klube sira hotu,” José Quintão Amaral relata.
Nia mós hato’o apresiasaun boot ba Asosiasaun AMAHORO no MIRAI SAT tanba kontinua fó apoiu ba realizasaun kompetisaun Sub-14 ne’e durante tinan tolu.
“Komisaun organizadór sente orgullu no agradese tebes ba Asosiasaun MIRAI SAT no AMAHORO tanba sira fó apoiu finanseiru no apoiu tékniku. Apoiu ne’e sai hanesan kontribuisaun importante ne’ebé ajuda ami atu hala’o prosesu tomak to’o remata. Objetivu husi eventu ne’e mak atu promove ambiente ne’ebé moos no saudável,” nia afirma.
Iha sorin seluk, Xefe Suku Maudemu, Maria Fatima, hateten katak AMAHORO Cup Rotativu ne’e realiza ona ba dala tolu iha Suku Maudemu, Postu Administrativu Tilomar. Nia hakarak atu atividade desportiva hanesan ne’e kontinua hala’o, hodi dezenvolve no hasa’e talentu juventude iha área futeból.
“Hanesan autoridade, ka Xefe Suku, hau sente orgullu ho atividade futeból ne’ebé Asosiasaun AMAHORO no MIRAI SAT organiza iha Postu Administrativu Tilomar ba dala tolu ona. Ami apresia tebes atividade ne’e tanba bele motiva labarik sira ho idade tinan 14 ba kraik atu dezenvolve sira-nia talentu iha área futeból,” Maria Fatima informa.
Aleinde ne’e, Maria Fatima rekomenda ba Ministériu Juventude, Desportu, Arte no Kultura (MJDAK) atu tau matan ba Kampu Futeból Salele, hodi bele halo hadi’ak no dezenvolve kampu ne’e sai Mini Estadiu ne’ebé kumpre padraun nasionál.
“Ami hakarak hato’o rekomendasaun ba Governu, liuliu MJDAK, atu tau matan ba ami-nia kampu. Kampu ne’ebé eziste iha Suku Maudemu, Postu Administrativu Tilomar, iha área ne’ebé luan no iha potensiál atu dezenvolve sai Mini Estadiu tuir padraun nasionál,” Maria Fatima afirma.
Kompetisaun AMAHORO Cup Rotativu ba dala tolu ne’e hetan partisipasaun husi komunidade no autoridade sira iha Postu Administrativu Tilomar no suku sira, ho esperansa atu kontinua fó oportunidade ba juventude atu dezenvolve sira-nia talentu liuhusi desportu.
Jornalista: Paul Mandeu
