Covalima (RCCT), 28-08-2026–Estudante estajiáriu husi Institutu Profisionál de Canossa (IPDC), Departamentu Téknika Komputasaun no Informátika, sei realiza atividade komemorasaun Loron Konsulta Popular, 30 de Agostu, hamutuk ho komunidade iha Suku Debus, Postu Administrativu Suai, Munisípiu Covalima.
Informasaun ne’e hato’o husi Xefi Estajiú Servisu Komunitáriu (ESK), Lucas Gusmão do Nascimento, ba Jornalista Rádio Comunidade Cova Taroman (RCCT).
Nia hateten katak estudante estajiáriu IPDC atualmente halo hela estajiú iha Suai durante fulan ida no semana rua, hahú husi 10 de Agostu to’o 24 de Setembru 2026.
“Ami husi estudante estajiáriu Institutu Profisionál de Canossa (IPDC), Departamentu Téknika Komputasaun no Informátika, dadaun ne’e ami halo hela estajiú iha Suai durante fulan ida no semana rua. Ami hahú husi loron 10 fulan Agostu to’o loron 24 fulan Setembru. Ami nia foku baibain iha área informátika, ne’ebé dadaun ne’e ami implementa atividade formasaun ba eskola, juventude sira, no atividade manutensaun ba ita-nia instituisaun, administrasaun no eskola sira,” Lucas Gusmão do Nascimento informa.
Nia hatutan katak, aproveita tempu komemorasaun Loron Konsulta Popular, jerasaun foun hakarak selebra loron istóriku ne’e liu husi atividade rua, mak semináriu no Konvíviu Popular.
“Aproveita ho Loron Konsulta Popular, ita mós nu’udar jerasaun foun, nu’udar Timoroan, hakarak selebra loron Konsulta Popular ida ne’e liu husi atividade rua. Primeiru, ita sei loke semináriu no, segundu, ita sei halo Konvíviu Popular. Semináriu ne’e inisiativa mai husi estudante estajiáriu sira rasik. Partisipante ne’ebé sei konvida mak estudante sira husi Ensino Báziku, Ensino Sekundáriu, organizasaun juventude sira, no mós autoridade lokál ne’ebé eziste iha Suku Debus, husi aldeia sia,” nia hatutan.
Entretantu, ba atividade Konvíviu Popular, nia hateten katak inisiativa mai husi Autoridade Suku Debus, ho koperasaun husi estudante estajiáriu sira.
“Ba fali iha programa Konvíviu Popular ne’e, oinsá ita atu halibur ita-nia komunidade husi aldeia sia ne’e? Oinsá kada aldeia atu halibur, balu halo tebe-dahur, hodi bele memoriza situasaun pasadu ne’ebé durante ne’e ita-nia populasaun sira enfrenta,” nia hatutan.
Nia subliña katak, liu husi atividade ne’e, jerasaun foun hakarak hametin valór unidade no solidariedade nu’udar Timoroan.
“Nu’udar estudante estajiáriu, ita mai ho hanoin ida kona-ba oinsá ita atu utiliza Konvíviu Popular ne’e ba ita hotu, hanesan jerasaun foun, ne’ebé ita tenke respeita diferensa lisan entre munisípiu sira. Maske ita diferente munisípiu, diferente kór, diferente relijiaun, diferente kultura no diferente etnia, liu husi estajiú ida ne’e bele kesi ami sai ida de’it hanesan RDTL. Entaun, ami tenke mai ho ideia ida ne’e atu suku hamutuk ita-nia unidade hanesan Timoroan,” nia subliña.
Atividade komemorasaun Loron Konsulta Popular ho Komunidade Suku Debus sei realiza iha loron 29 de Agostu 2026.
Jornalista: Julião Correia
Editor: Paul Mandeu
