Covalima (RCCT), 28-08-2026 — Diretór Interinu Servisu Saúde Munisípiu Covalima, Teofilho Amaral, informa katak iha tinan 2026, Autoridade Munisípiu Covalima, liu husi Servisu Saúde Munisípiu no Programa Dezenvolvimentu Integradu Munisípal (PDIM), ezekuta projetu konstrusaun postu saúde foun lima iha Munisípiu Covalima.
Nia esplika katak konstrusaun ne’e la’ós de’it inklui edifísiu ba atendimentu saúde, maibé mós rezidénsia ba pesoal saúde. Medida ne’e ho objetivu atu asegura katak pesoal saúde bele hela besik ba fatin servisu no bele fó atendimentu ho lalais, liuliu bainhira akontese situasaun emerjénsia.
“Tinan ida ne’e, Autoridade Munisípiu Covalima, liu husi Servisu Saúde Munisípiu no Programa Dezenvolvimentu Integradu Munisípal (PDIM), ita konstrui Postu Saúde lima (5), mak hanesan Postu Saúde Fatoloro, Cassabauk, Suai Loro, Matai no Usecai, pakote ho rezidénsia ba pesoal saúde,” Teofilho Amaral informa.
Ligadu ho planu estratéjiku setór saúde, Diretór Interinu Servisu Saúde Munisípiu Covalima, Teofilho Amaral, dehan katak objetivu prinsipál mak atu garante katak kada suku iha Munisípiu Covalima tenke iha estabelesimentu saúde ida.
“Ita Servisu Saúde Munisípiu Covalima tuir planu estratéjiku setór saúde nian, katak kada suku ida tenke iha estabelesimentu Sentru Saúde ida. Agora iha Covalima ita konklui ona suku 30 no estabelese hotu ona. Foin lalais hela suku rua, Cassabauk ho Usecai, maibé agradese tanba tinan ne’e tama ona iha PDIM no agora konstrusaun la’o hela,” nia hatutan.
Empreza no Orsamentu Konstrusaun
Projetu konstrusaun postu saúde no rezidénsia ba médiku iha Suku Cassabauk, Empreza Lifran Unip, Lda. mak toma responsabilidade, ho orsamentu hamutuk US$ 307.070,33.
Enkuantu ne’e, Empreza Buimaras Implementa mak implementa projetu konstrusaun postu saúde no rezidénsia ba médiku iha Suku Fatoloro, Postu Administrativu Fatu-Lulik, ho orsamentu US$ 348.579,78.
Aleinde ne’e, Empreza Titor Unip, Lda. mak konstrui postu saúde no rezidénsia ba médiku iha Suku Usecai, ho orsamentu US$ 404.592,05.
Iha Suku Suai Loro, Empreza Futuru Mane Mesak Unip, Lda. implementa projetu konstrusaun postu saúde no rezidénsia ba médiku, ho orsamentu US$ 308.025,59.
Enkuantu iha Suku Matai, Empreza Sabudoi Unip, Lda. implementa projetu konstrusaun postu saúde no rezidénsia ba médiku, ho orsamentu US$ 319.281,54.
Jornalista: Julião Correia
Editor: Paul Mandeu
