Covalima (RCCT) 24/08/2026–Alunus estajiáriu husi Institutu Profisionál de Canossiana (IPDC) halo manutensaun ba laptop hamutuk 24 ne’ebé uza husi Polísia Suku (PS), iha Komandu Polísia Nasionál Timor-Leste (PNTL), Munisípiu Kovalima.
Atividade ne’e hala’o tanba laptop Polísia Suku balun iha kondisaun aat no presiza manutensaun, atu nune’e bele fasilita sira-nia servisu iha suku.
Reprezentante Xefe Ekipa Estajiáriu IPDC, Lucas Gusmão, hateten katak atividade manutensaun laptop 24 ne’e hanesan atividade voluntária ne’ebé alunu estajiáriu sira hala’o durante sira-nia estájiu iha Suku Debos, Postu Administrativu Suai.
Nia hateten, departamentu tékniku komputadór no informátika IPDC mós prontu atu fó apoiu ba manutensaun ekipamentu teknolojia iha Komandu PNTL Kovalima.
Durante ne’e ami simu sasan eletróniku avariadu husi komunidade. Tanba ne’e, ami halo manutensaun no instalasaun ba laptop sira ne’ebé presiza. Ami sei halo servisu ne’e ho di’ak no garante atu manutensaun no instalasaun lao ho susesu, Lucas Gusmão, relata.
Liuliu, atividade ne’e fó oportunidade ba alunu estajiáriu sira atu hasoru diretamente ho Komandante PNTL Munisípiu Kovalima no haree situasaun ekipamentu informátika iha komandu.
Iha parte seluk, Komandante PNTL Munisípiu Kovalima, Superintendente Xefi Paulino do Carmo Pereira, louva inisiativa no apoiu husi alunu estajiáriu IPDC tanba laptop Polísia Suku barak mak iha ona problema no la bele uza ho di’ak.
Nia hateten katak manutensaun ne’e importante atu ajuda Polísia Suku sira kontinua hala’o servisu ho fasilidade di’ak liután.
Ita hasoru malu ho alunu estajiáriu sira ho intensaun atu lori laptop sira ne’ebé aat no presiza manutensaun, nune’e alunu estajiáriu sira bele ajuda halo manutensaun ba ekipamentu sira ne’e, Superintendente Xefi Paulino do Carmo Pereira, informa.
Komandante PNTL Kovalima mós apresia inisiativa alunu estajiáriu sira tanba atividade ne’e fó benefísiu direta ba Polísia Suku no ajuda komandu iha área teknolojia informasaun.
Alunu estajiáriu IPDC husi Departamentu Tékniku Komputadór no Informátika antes ne’e mós halo ona manutensaun voluntária ba komputadór no laptop iha instituisaun edukasaun sira, inklui Eskola Sekundária Jerál Públika Suai no Eskola Tékniku Vokasionál Kristal Suai.
Jornalista Paul Mandeu
