Covalima (RCCT) 30-06-2026-Estudante Universidade da Paz (UNPAZ) kompostu fakuldade neen hala’o aktividades Programa Estajiu Institusional (PEI) iha Kampus UNPAZ ramu Covalima durante fulan ida, iha programa ida ne’e estudante estajiadu sira elabora problema sosial sira tuir sira nia metodu analiza SWHOT, oinsa atu hare problema no solusaun ba sosiedade Munisipiu Covalima, hodi aprezenta ba autoridade kompetente munisipal hodi tau atensaun maximu ba problema sira ne’e.
Pro-Reitor Asuntus Akademiku Juanino Xavier Hei, relata programa ida ne’e hahu primeiru mak naran Pratika Aprendijajen Kampu (PAK) iha semester V oinsa atu elabora dadus sira hodi ba aprezenta iha Universidade hodi hatene problema sira no iha Semester VII mak ita hakat ba fali programa estajiu institusional hodi halo seminariu hodi aprezenta dadus sira ne’e.
Hahu Rekolla dadus no dadus sira ne’e relevante ho programa estudu ne’ebe sira foti ba, sira aprende entaun depois sira rekolla sira fila fali ba Universidade hamutuk ho dosente orientador sira, giaun sira halo analiza sira nia dadus ne’ebe sira rekolla iha terenu depois sira halo relatoriu, relatoriu ne’e sira bainhira atinji to’o semester VII tinan tuir mai, sira mai halo programa ohin loron ita realiza seminariu ne’e ho naran Programa Estajiu Institusional (PEI) ne’e kontinuasaun husi Pratika Aprendijajen Kampu (PAK) quer dizer que sira mai aprezenta fali rezultadu sira rekolla iha semester V ne’e, iha ne’e rezultadu sira rekolla hodi aprezenta iha seminariu ne’e bazeia ba dadus ne’ebe sira foti iha terenu ne’ebe progresu kona ba iha Munisipiu hanesan iha Covalima nian depois husi Munisipiu tun to’o iha aldeia sira, iha ne’e sira foti kona-ba progresu no ninia frakeza sira.” Juanino Xavier Hei, relata.
Iha sorin seluk Estudante Estajiadu Mateus de Neri relata iha Programa Estajiu Institusional (PEI) ami mai husi fakuldade neen no ami foti dadus tuir ida idak nia area ezemplu Fakuldade Saude Publiku foti dadus kona-ba asuntus Saude nian atu nune’e ita bele hatene problema sira ne’ebe iha Munisipiu Covalima ida ne’e.
Por tanto iha programa ida ne’e ami identifika problema ne’ebe mak espesifiku tebes ligadu ho fakuldade ida idak ne’ebe relata aan ba hanesan ezemplu fakuldade Siensias Sosiais nia foti liu kona-ba nia area hanesan problema sosial sira ne’ebe mak komunidade sira enfrenta hanesan direitu karik sira foti problema kona-ba direitu ka lei nian, tanto iha programa ida ne’e ami konsege identifika au mesmu tempu la konsege halo seminar ho ne’ebe mak di’ak tanba autoridade lokal husi postu no suku sira tanba prezensa sira nian menus tanba ne’e ami aprezenta jeral ba autoridade munisipiu no dadus sira ne’ebe ami aprezenta antes ami ta’es ka analiza kle’an hodi aprezenta dadus hirak ne’e tuir faktus ne’ebe iha.” Mateus de Neri, haktuir.
Aktividade seminariu Programa Estajiu Institusional (PEI) ho tema Siensia Transforma Dezenvolvimentu ba Sosiedade realiza iha salaun Kampus UNPAZ ramu Covalima husi estudante estajiadu Universidade da Paz, no marka prezensa husi reprezentante PAM Covalima, Xefe Suku, Comandante Polisia Munisipiu Covalima no Estudante Ensinu Sekundaria sira.
Jornalista Paul Mandeu
