Covalima (RCCT) 21-11-25-Governu liu huis Sekretaria Estadu ba Igualiade (SEI) hamotuk ho autoridade Munisipiu Covalima, selebra loron nasional ba feto timor leste ba da 49 (3 Novembru 1976-3 Novembru 2025). Loron Nasional ba feto Timor Leste nudar loron ida ne’ebé importante tebes iha istoria Timor Leste nian. Loron ne’e hodi fo onra no rekoñesimentu ba feto Timor Leste ne’ebé uluk didika sira nia an ba luta libertasaun nasional.
Pontu Fokál SEI iha Munisípiu Covalima, Francisco T. G. de Araújo dehan iha selebrasaun ne’e sai hanesan reflesaun ida ba jerasaun foun sira atu valoriza ba independensia ne’ebé hetan liu husi sakrifisiu oi oin.
“ita nia objetivu mak ita atu fo onra ba iha ita nia eroiñas sira ne’ebé mak mate iha funu ne’ebé mak sakrifika sira nia an iha luta ba iha ukun rasik an ida ne’e. Iha komemorasaun ida ne’e atu sai reflesaun ba ita jerasaun foun sira atu bele partisipa di’ak liu tan, atu bele komprende di’ak liu tan katak ukun rasik.” Pontu Fokál SEI iha Munisípiu Covalima, Francisco T. G. de Araújo dehan
Reprezenta Prezidente Autoridade Munisipiu (PAM) Munisipiu Covalima, atual Diretóra Servisu Munisipal Jestaun Merkadu no Turizmu, Tereza Pires, dehan, importante tebes partisipasaun feto sira iha prosesu dezenvolvimentu
“Ida ne’e hanesan oportunidade ida ba ita feto mos bele atu hola parte iha aktividades sira. Hahu ohin ba oin ita mos tenke partisipasaun iha aktividades sira, hahu promove ida idak nia an la bele taka ita nia an, hanesan feto ba loron ida ohin ita sente kontente katak oportunidade ne’ebé ba ita feto iha, orgullu tempu ida agora ita hare katak maske seidauk to’o tinan maibe ita feto mos bele ona lidera” Tereza Pires, dehan.
Selebrasaun loron nasional ba feto timor leste ba da 49, iha Covalima ne’e, realiza iha Salaun Administrasaun Munisipiu Covalima, iha ne’eba partisipa husi Prezidente CMCLN, Jestora Muzeu Memorial Munisipal Covalima, PNTL Covalima, Sobrevivente sira, Autoridades Lokais sira inklui Grupu Feto sira.
Jornalista : Mandeu
Editor : Chamot Nahac
