Covalima(RCCT)13-08-25-Autoridade Protesaun Sivil (APC) atribui apoiu rekoperasaun ba vitima dezastre naturais hamotuk familia 22 husi Suku Nanu, Postu Administrativu Fatumea, Munisipiu Covalima iah ne’ebé kada familia hetan material Konstrusaun no Osan dolar amerikanu rihun ida ($1,000.00).
Familia hamotuk 22 ne’e sai vitima ba dezastre naturais ho tipu rai halai, ne’ebé akontese fulan marsu 2025 iha Suku Nanu. Tan ba ne’e, Sekretariu Munisipal Asuntu Sosiais no Organizasaun Komunitaria, Filomeno Cardoso, husu ba benefisiariu sira atu aprovita utiliza apoiu material konstrusaun ne’e governu fo hodi hari fali uma ne’ebé hetan estraga husi dezastre naturais.
“Ita bo’ot sira prepara transporte husi ne’e ba fali to’o ita nia hela fatin ne’ebé fo tempu fulan tolu husi ohin simu ka aban simu ka bainrua simu sura husi ne’e ba fulan tolu ami sei ba hare fali depois ida ne’e fulan tolu ami sura fulan tolu ne’e remata, ami ekipa tomak husi nasional, munisipiu sei ba hare direita ita bo’ot sira nia uma, prossesu agora ita halo entrega sasan sira ba ita bo’ot sira hodi hein prossesu fulan tolu mai ne’e jestaun ita nia tekniku sira mak bele ba ho ita bo’ot sira apoiu ita bo’ot sira iha prossesu halo fali uma ne’ebé mak ita bo’ot sira nia uma aat ba sai fali uma ne’ebé mak bele di’ak ba ita bo’ot sira hela ba” Filomeno Cardoso, dehan.
Diretór Ezekutivu Autoridade Protesaun Sivil, Gui Savio Vicente Caeiro, esplika kada familia hetan osan ho montante dolar amerikanu rihun ida ($ 1,000,00), ne’ebé fahe ba osan transporte hamotuk $ 150 no $ 850 uja hodi apoiu halo konstrusaun uma.
“Orsamentu ne’ebé mak ita bo’ot sira hetan make ema ida $ 850 tau tan ho osan transporte $ 150 mais ida ne’e ba ohin loron sei la simu lai ita fo uluk material konstrusaun ne’ebé mak ita prepara daudaun ne’e, orsamentu total hamutuk 22 mil ema ida hetan mil” Diretór Ezekutivu Autoridade Protesaun Sivil, Gui Savio Vicente Caeiro, esplika.
Material konstrusaun ne’ebé APC Atribui ba Familia Vitima rai halai (Erosaun) akontese iha fulan marsu Tinan ne’e iha Suku Nanu, Postu Administraivu Fatumea, mak kada familia hetan semente Saka 50, Zinku Tahan 50, Besi Beton lolon 60, Besi kuadradu (Kotak) lolon 50 no Osan dolar amerikanu rihun ida ($1,000.00).
Jornalita :Gabriel Amaral da silva
Editor : Chamot Nahac
