Covalima (RCCT) 21-07-25-Diretór Servisu Munisipal Asaun Sosial Munisipiu Covalima Clementino Bere, husu ba familia vuneravel sira iha Postu Administrativu Zumalai ne’ebé hetan apoiu osan ho montante dolar Ameriknu atus rua ($ 200) kada familia, labele utiliza osan hodi joga (taru) bingo, maibe tenki jere hodi hadi’a moris.
Clementino Bere, hato’o lia hirak ne’e liu husi nia intervensaun hafoin ho ekipa atribui osan ba familia vuneravel hamutuk 13 iha Zumalai, iha ne’ebé kada familia hetan osan $200.
“Governu atu haforsa ita nia kbi’it liu liu ba feto vuneravel ne’ebé durante ne’e la iha kbi’it atu selu oan sira nia eskola no hodi hare nesesidade uma laran, tanba ne’e husu ba inan feton sira hotu katak bainhira osan ne’e entrega ona ba inan feton sira hotu, osan ne’e bele fila ba uza didi’ak labele uza hodi ba fali joga bingo no ba buat seluk la bele, osan ne’e ita uza ba ita nia nesesidade, no husu ba inan feton sira bele utiliza osan refere lori doda gazolina bele fa’an no halo pisang goreng ruma fa’an hodi aumentan tan ita nia forsa, tanba estadu fo osan ne’e la’os naran fo deit fo atu hodi hadi’a ita nia moris” Diretór Servisu Munisipal Asaun Sosial Munisipiu Covalima Clementino Bere, dehan.
Benefisiaria Agustinha Lopes, kompromete katak ho osan ne’ebé governu ajuda ho montante dolar amerikanu atus rua sei utiliza hodi apoiu ninia atividade negosiu hodi hetan rendimentu para apoiu oan sira ba eskola to’o nivel universidade.
“Durante ne’e hau halo hela dose, ne’ebé ho ajuda husi estadu fo osan uitoan mai ona hau sei utiliza hodi kontinua halo dose fa’an para hetan osan hodi sustenta ba nesesidade loro-loron nian no hare ba oan sira nia eskola, durante ne’e mos ha’u sente hare ba nesesidade uma laran ne’e todan, maibe ho ajuda ida ne’e sente ohin loron ne’e kontente uitoan” nia dehan.
Molok ne’e Servisu Munisipal Asaun Sosial hala’o ona asesmentu hodi identifika familia vulneravel hamotuk 13 iha suku ualu ne’ebe partense iha Postu Administrativu Zumalai Munisipiu Covalima.
Jornalista : Julio Salinas
Editor : Chamot Nahac
