Covalima (RCCT) 21-07-25-Autoridade Munisipiu Covalima liu husi Servisu Munisipal Asaun Sosial fo apoiu osan ba feto vulneravel hamutuk 13 iha Postu Administrativu Zumalai, iha ne’ebé kada familia hetan osan ho montante dolar amerikanu atus rua ($ 200).
Diretór Servisu Munisipal Asaun Sosial Munisipiu Covalima, Clementino Bere relata katak molok atribui osan ne’e, Servisu Munisipal Asaun Sosial hala’o uluk levantementu dadus hodi identifika familia hamotuk 13 husi suku ualu ne’ebé patense iha Postu Administrativu Zumalai.
“Ami mai hamutuk iha ne’e lao tuir buat ne’ebe semana kotuk ekipa tun halo asesmentu direita ba inan feton sira mak los duni iha direitu atu hetan apoiu ruma husi ita nia Governu tanba ida ne’e mak rezultadu ohin ita mai hamutuk para ami intrega apoiu ba inan feton sira hamutuk ema na’in sanulu resin tolu.” Diretór Servisu Munisipal Asaun Sosial Covalima, Clementino Berem dehan.
Benefisiaru Agustina Lopes kogratula governu no nia kompromentu sei jere osan ne’ebé governu fo hodi asegura ba ninia oan nesesidade eskola nian.
“Agradese ba governu. Durante ne’e ha’u nesesidade iha uma ne’e ha’u sente todan itoan ne’ebé ohin hetan ajuda hodi nune’e antes ne’e ha’u halo hela dosi hodi fa’an, rai osan ba ha’u nia oan sira atu kontinua sira nia estudu iha universidade” Agustina Lopes, hatete.
Iha fatin ne’e, reprezentante Administrador Postu Administrative Zumalai, Armando da Silva taus esperasa ba apoiu ne’ebé governu fo bele ajuda benefisiariu sira sustenta nesesidade moris loro loron.
Jornalista : Alfredo Barreto
Editor : Chamot Nahac
