Covalima (RCCT) 18-07-25-Organizasaun Naun Governamental (ONG) Hametin Lia Tatoli (HLT) atribui fasilidade hanesan Tanki Be mos, material ba kanalizasaun irigasaun turuk, fasilidade eletrifikasaun no mos fini pateka no seluk tan ba grupu agrikultura 2 iha Suku Maudemo Postu Administrativu Tilomar Munisipiu Covalima.
Diretór Exekutivu ONG Hametin Lia Tatoli (HLT) Cipriano Menezes, relata katak ONG HLT apoiu mos grupu agrikultor sira halo perfurasaun be posu hamotuk rua no mos instala liña eletrisidade husi Estrada bo’ot liga ba to’os ho distansia kilometru ida resin.
“ONg HLT liu husi programa promove partisipasaun jeneru iha dezenvolvimentu hasa’e produsaun agrikola ne’ebé apoiu material mak hanesan tanki Profile, besi kanu, besi siku, irigasaun turuk polypape, makina slup, fiu metan fiu mutin, fini pateka no seluk seluk tan ba grupu sira hodi nune’e bele hasa’e produsaun agrikola nian” Diretór Ezekutivu ONG Hametin Lia Tatoli (HLT) Cipriano Menezes, informa.
Reprezenta Prezidenti Autoridade Munisipiu Covalima, atual Diretóra Servisu Munisipal Apoiu Organizasaun Komunitaria, Maria de Jesus Pereira, husu ba membru grupu hotu kontinua kontribui hasa’e produsaun agrikola hodi bele resposponde ba prgrama merenda eskolar.
“Atu nune’e merkadu ne’e besik mai liu ita maka merenda eskolar ne’ebé iha Munisipiu ami sempre foti ida ne’e katak merkadu ne’e la’os dok maibe besik liu ne’e merkadu merenda eskolar hanesan nia la sosa deit loron ida deit maibe loron loron ne’ebé oinsa ita produs ho kuantidade no kualidade ne’ebé di’ak atu nune’e sira bele sosa ba ita nia oan sira hodi tein ba ita nia oan sira han loro loron” Maria De Jesus Pereira, dehan.
Iha atividade atribui fasilidade agrikultura ne’e, ONG HLT no Autoriade sira halo mos inaugurasaun ba posu rua hafoin kontinua treinamentu ba memgru grupu sira konaba hakbit agrikultura familiar liu husi atividade oltikultura hodi garante ekonomia uma laran.
Jornalista : Alfredo Barreto
Editor : Chamot Nahac
