Covalima (RCCT) 06-06-25-Hafoin halo estudu komparativa iha nasaun sira ne’ebé ninia dezenvolvimentu setor agrikultura avansadu hodi hasa’e produsaun ida ne’ebé di’ak tebes, volume exportasaun ai han (fos) ba nasaun seluk inklui timor leste bo’ot tebes, maka Prezidente Autoridade Munisipiu Covalima, Miguel Armada Cardoso “Razao” optimista hakarak dezenvolvimentu setor agrikultura iha Covalima hanesan ho nasaun Vietnam.
Prezidente Autoridade dehan lia ne’e tanba Covalima iha rai bokur no area luan tebes ne’ebé iha potensialidade bo’ot ba setor agrikultura.
“Ezemplo iha Thailandia la’os komunidade sira maka halo natar, maibe pengusaha sira maka halo natar hodi fo servisu ba komunidade, iha nasaun Xina mos hanesan ne’e, ha’u hakarak Covalima sai hanesan ne’e, Covalima sei sai Vietnam kedua, Beilaku sai Vietnam kedua, tanba sa ha’u ko’alia hanesan, se Beilaku ita halo buat ne’e di’ak, se produsaun ne’e sa’e ona automatikamente osan ita labele rai ona ba agrikultura maibe rai fali ba seguransa alimentar, oin nusa ema halo pengawetan ba hahan” Informa PAM Covalima Miguel Armada Cardoso (Razao) hafoin partisipa iha serimonia kompania Queenzha Falov Unipesoal Lda entrega uma merkadu Beko Autoridade Covalima Sesta (06/06).
PAM Covalima afirma Oras ne’e daudaun produsaun haree iha Beilaku sae tanba uza ona makina modernu, no planu ba oin sei dezenvolve mos setor agrikultura iha Suku Beko.
“Natar agora dadaun ita nian iha Beilaku nia produsaun sa, Beilaku uluk halo produsaun dala ida sa’e ba tonelada 2-3 agora kada ektares sa’e ona ba 4-5 toneladas, artinya sa’e tanba ita uza ona mesin kuda haree, uza ona mesin ko’a haree buat hotu kompletu ona, cuma prolema bo’ot ida maka komunidade maka baruk ten demais, iha Raimea ne’eba, hanoin ba iha Suku Beko nian ne’e maka Ha’u ko’alia bebeik ona ho Diretór Servisu Munisipal Obras atu halo fundus infraestrutura ne’e ita tau osan maka’as hodi halo penampungan bee ida nune’e bee labele naran sulin arbiru no estraga deit, maibe atu realiza buat sira ne’e ha’u hakarak iha loron sexta halo reuniaun ho komunidade katuas lian na’in sira intelektual komunidade aldeia 11 iha Suku Beko ne’e mai hotu para ha’u atu ko’alia ho sira konaba ida ne’e” PAM dehan.
Tanba ne’e PAM husu ba komunidade sira labele baruk iha rai bokur nia leten, tenke badinas halo to’os no natar hodi hasa’e produsaun Rai laran.
Jornalista : Julio Salinas
Editor : Chamot Nahac
