COVALIMA—–Pontu Fokal Ra’es Hadomi Timor Oan (RHTO) Munisípiu Covalima, Rosito Amaral, informa hahu iha tinan 2019 to’o 2022 Ra’es Hadomi Timor Oan (RHTO) konsege rejista ema ho difisiénsia iha Munisípiu Covalima hamutuk ema na’in-304.
“Dadu ne’ebe hau rekolla iha tinan 2019 to’o 2022 konsege hetan maluk difisiénsia sira hamutuk na’in-304 iha Covalima” informa Pontu Fokal Ra’es Hadomi Timor Oan (RHTO) Munisípiu Covalima, Rosito Amaral, ba jornalista sira iha Bairro Rompe, Suku Debos, Postu Administrativu Suai, Segunda (20/03).
Nia afirma husi numeru ema ho difisiénsia hamutuk na’in-304 iha Covalima ne’ebe rejista ona husi RHTO, iha maluk difisiénsia na’in-6 maka asesu ba eskola, maibe husi sira na’in-6 ne’e na’in-2 remata ona iha nivel sekundaria, na’in-4 sei kontinua eskola.
Nia dehan husi dira na’in-6 hetan apoiu finanseiru husi RHTO maske la boot.
“Sira na’in-6 ami fo osan insentivu ba sira, osan uitoan ami fo ba sira Kade ema ho montante $ 75 ba tinan ida tuir kbi’it RHTO nian” nia haktuir.
Nia sublina planu ba tinan 2023 atu apoiu insentivu ba maluk difisiénsia sira ne’ebe eskola sei dauk hetan ne’e iha ona ema na’in-3, maibe ba agora daudaun sei prosesa hela sira nia dokumentus, maibe molok fulan ne’e remata RHTO bele apoiu ona insentivu ne’e ba sira.(Azu)
