Vítima Violasaun Sexual 1999 iha Igreja Suai Na’in Ida Halai Fila Mai Timor Husik Hela Oan Na’in Tolu Iha Indonésia

Manuel Soares aman ba Juliana dos Santos. FOTO RCCT/Tynho Gusmão

Covalima (RCCT) 10-01-22, Covalima Oan Feto ida ho naran Inisial JdS ho idade 38 ne’ebé uluk sai vitima iha Igreja Ave Maria Suai tanba hetan Violasaun Sexual dahuluk husi Militar Indonésia (TNI) no Milisia Pro-Indonesia iha Tinan 1999,Ne’ebe Durante ne’e Hela iha Metamauk, Malaka, Indonesia dadaun ne’e halai fila mai Timor no husik hela Oan na’in tolu iha Indonésia ne’eba tanba hetan bebeik agresaun fíziku husi nia La’en ne’ebé uluk lori nia ba Indonésia.

Manuel Soares hanesan Aman ba JdS, konta katak hahu horiseik loraik (09/01) tuku tolu JdS halai husi Metamauk indonesia mai Timor, to’o ohin dader tuku 4 Otl madrugada foin to’o iha Fronteira Salele Covalima.

” Horiseik jam tiga nia halai sai husi Metamauk ka nanfalus ne’e, to’o jam empat nia to’o batas ne’eba ne’e, nia tun husi motor lansung halai liu husi Mota laran mai liu, nia halai mai tanba nia La’en baku bebeik nia ho nia oan sira hodi ameasa dehan “o ha’u Oho o” entaun hau nia oan sente moras la diak nia halai mai tan ami, ne’e maka horikalan hau ho polisi sira ba buka konsege hetan Duni hau nia oan” Manuel konta iha Kuárentina Bairo Kosta bainhira Ekipa Saúde izola Alola iha Kuárentina (10/01).

Manuel deside sei la haruka nia Oan Feto fila ba Indonésia, tanba nia oan Feto mos sai vitima iha igreja Ave Maria Suai iha tinan 1999.

” Ha’u Haruka nia la fila ona, tanba nia la’os Refuziadu maibe vítima ba igreja Suai ne’e nian, Ha’u nia Oan ne’e naran Alola, ne’ebé Fundasaun Alola ne’e mai husi Nia,” Manuel informa.

JdS iha oan na’in tolu, no Oan primeiru forma ona Uma ka’in, no Oan Segundu sei hala’o Estudu iha Kupang Indonésia na’in ida ikus sei Eskola iha SD.

Entretantu dadaun ne’e JdS sei Kumpri hela iha kuarentina Bairo Kosta Suai duránte semana ida, maske simu ona Vasina muderna iha Indonésia.

Jornalista : Tynho Gusmão

Editór       : Chamot Nahac