Covalima (RCCT) 27-11-21, Molok Komemora loron Proklamasaun Independénsia 28 de Novembru iha Covalima, Vise Ministru Edukasaun Joventude no Desportu (MEJD) Antonio Guterres akonpanha Husi Administrador Munisipiu Covalima (AMC) no Komandante PNTL Covalima vijita Monumentu Massakre Rai-Ulun (MMRU) 12 de Setembru 1999 iha Suco Laktos Postu Administratuvu (PA)Fohorem.
Ba Jornalísta RCCT Vice Ministru Antonio Guterres dehan, Iha Vijita ne’e atu presta omenazem ba Mártires sira iha Monumentu Masakre Rai-Ulu, tanba konsidera sira hanesan Heroi ba Nasaun RDTL ne’ebe sakrifika ba Ukun Rasik An.
” Ita hatene aban loron Proklamasaun Independénsia hanesan loron istóriku ba Nasaun Timor-Leste ne’ebe ita atu selebra, ne’ebe Suco Laktos hanesan fatin Istóriku ida, tanba ita nia katuas ferik no Juven barak maka mate tanba inimigu sira oho depois sunu iha ne’e, tanba ne’e maka hanesan Governu mai presta omenajem ba sira tanba sira nia Sakrifisiu maka ohin loron ita goja” Governante ne’e dehan iha Suco Laktos (27/11).
Iha Fatin ne’e Administrador Postu Administrativu (APA) Fohorem sente orgullu ho Vise-MEJD nia prezensa, tanba vijita ona fatin ne’ebe inimigu Indonésia Sunu Laktos Oan sira hamutuk 14 ne’ebe hanaran Monumentu Rai-Ulu 12 de Setembru 1999.
” Ha’u sente haksolok tanba Sua Exselensia Vise-MEJD to’o iha fatin Massakre 12 de Setembru 1999 iha Suco Laktos, ne’ebe maka ita nia maun alin hamutuk 14 ne’ebe Inimigu sira oho hodi sunu iha Fatin ne’e” APA Fohorem informa.
Entretantu Governante ne’e sei vijita mos Monumentu Setembru Negro Suai, inklui Saudozu “Sesurai” nia rate hodi presta Omenajem molok Komemora loron Proklamasaun Independénsia ba Dala 46 iha Kampu Ladi PA Suai.
Jornalísta : Tynho Gusmão
Editór : Chamot Nahac
