Vise-MEJD Enkoraja Komunidade Suco  Dato-Tolu Atu Simu Vasina Covid-19

Covalima (RCCT) 01-10-21, Vise-Ministru Edukasaun Joventude no Desportu hala’o kampanya Programa Nasional Vasinasaun Kontra Covid-19 Iha Aldeia Natardik Suco Dato-Tolu Postu Administrativu Fohorem Munisipiu Covalima.

Iha Intervista ho Jornalísta sira Vise Ministru Edukasaun Joventude no Desportu (MEJD) Antonio Guterres hateten, objetivu Kampanya ne’e atu enkoraja komunidade sira nune’e bele hakbesik ba Sentru Saúde hodi simu Vasina kontra Covid-19, atu nune’e bele livre husi situasaun nebe maka Nasaun ne’e enfrenta hela.

“Vasinasaun ne’e Programa Governu nian, tanba ne’e Ha’u nia prezensa mai iha ne’e, atu enkoraja ita nia Komunidade sira nebe seidauk vasina, tenke hakbesik ba Sentru Saúde hodi hetan Vasinasaun, atu nune’e ita bele livre lalais husi situasaun ne’ebe maka ita nia Nasaun enfrenta hela” Governante ne’e dehan iha Sede Aldeia Natardik (01/10)

Governante ne’e mos rekonhese, Komunidade iha Suco Dato-Tolu ladun asessu ba informasaun tanba Komunidade seidauk asessu ba Eletrisidade, maske nune’e nia enkoraja komunidade sira tenke simu vasina no la bele fiar informasaun nebe falsu.

” Agora Suco Dato-Tolu seidauk asessu ba eletrisidade, tanba ne’e sira atu asessu informasaun liu husi Televisaun no radio sira ne’e difisil tebes, maibe la bele fiar informasaun falsu, tenke vasina tanba dalan atu hakotu moras ida ne’e maka tenke vasina” Governante ne’e hatutan.

Iha fatin ne’e Xefe Suco Dato-Tolu João Agustinho Resi  promesa, sei mobiliza Komunidade sira nebe hetan influensia husi parte balun atu labele simu vasina, atu  Sira hotu bele partisipa iha Vasinasaun kontra Covid-19 ne’e.

” Ho prezensa Vise Ministru nian bele haforsa tan Ha’u nia Komunidade sira nebe maka lakohi Vasina, maibe ha’u sei halibur sira atu nune’e Komunidade iha Suco ne’e tenke simu vasina hotu”  Xefe Suco Dato-Tolu João Agustinho Resi Informa. 

Enkuantu Hafoin remata vijita iha Postu Fohorem, Vise MEJD sei kontinua ba vijita Postu Administrativu Maukatar.

Jornalísta : Tynho Gusmão
Editor       : Chamot Nahac