Covalima (RCCT) 06-07-21 Vise-Ministru Edukasaun Joventude no Desportu Antonio Guterres apresia ba dezenvolvimentu Iha Eskola Sekundaria Geral Publika Suai (ESGP) tanba dezenvolvimentu iha ESGP ne’e kontribui rasik husi Komunidade sira.
Lia ne’e hato’o iha diskursu bainhira halo Kanpanha Vasinasaun kontra Covid-19 ba Estudante sira iha ESGP Suai.
“Lori Ministériu Edukasaun nia naran hakarak atu fo parabens ba Eskola ida ne’e tanba iha vontade bo’ot ho voluntariu kontribui ba dezenvolvimentu Iha Eskola ne’e, ida ne’e valor ida nebe maka bo’ot hodi kontribui ba dezenvolvimentu Edukasaun” Governante ne’e dehan.
Governante ne’e husu ba Professor sira hotu atu servisu interligadu hodi nune’e Edukasaun bele sai forti liu tan iha Futuru.
” Ha’u husu ba Professor sira hotu atu servisu hamutuk husi kraik ba leten ka ita bele dehan interligadu atu nune’e bele haforsa Edukasaun sai forti liu tan” Governante Informa.
Iha Fatin ne’e Diretor ESGP Suai Francelino Freitas Carvalho esplika, kontribuisaun husi inan aman maka ESGP Suai Preve osan ho montante $ 2.500 Dolares Amerikanu hodi sosa ekipamentus hodi instala iha sala IT nsst.
“Durante ha’u nia mandatu ami halo rehabilitasaun ba turma rua ida ne’e kontribuisaun mai husi Inan aman, konstro Rede haleu Eskola, armariu, Meza, Sosa Banda musika, hadia kadeira sira, Komputador 30, depois ami Preve osan nebe mai husi Inan aman hamutuk $2.500 dolar hodi sosa ekipamentus hodi instala iha sala IT nsst, ida ne’e mai husi kontribuisaun inan aman sira” Francelino dehan.
Iha Kampanha Vasinasaun iha ESGP Suai ne’e partisipa husi Diretor Edukasaun Munisipiu Covalimai, Professor sira no Partisipa maximu husi Estudante sira iha Eskola refere.
Tuir observasaun hafoin halo kampanha Vasinasaun iha ESGP Suai, Governante ne’e kontinua hakat ba ESTV Kristal Suai hodi dezemina informasaun konaba Vasinasaun Covid 19.
Jornalísta : Tynho Gusmão
Editor : Chamot Nahac
