Verifikasaun Dadus Veteranus Iha Covalima To’o Ona Iha Suco Holpilat Aldeia Lela

Komunidade Suku Holpilat akompaña Ekipa Komisaun Verifikasaun sunu lilin hodi presta omenajem iha Semitériu Lela no Sadan Mau Lela iha Foho Mapele ba Saudozu Albino do Carmo ho nia soldadu sira ne’ebe mate iha 1976. Foto RCCT/ Tynho Gusmão

Covalima (RCCT) 29-11-21, Komisaun Verifikasaun dadus ba Veteranus ne’ebé rejistu iha tinan 2009, to’o ona iha Postu Administrativu (PA) Maukatar Suco Holpilat abertura iha Aldeia Lela.

Presidente Ekipa Verifikasaun dadus Veteranus 2009 Francisco Doutel Sarmento “Lamesak” esplika Verifikasaun dadus Veteranus iha Covalima atinji ona 75% ho nune’e Fulan Marsu tinan 2022 Covalima remata ona verifikasaun dadus Veteranus.

” Ha’u seidauk bele fo dadus sira ne’ebe maka verifika ona, maibe ita nia prosessu verifikasaun iha Covalima ne’e atinji ona 75%, falta 25% para atu remata atividades verifikasaun ida ne’e, ne’ebe Fulan Febreiru ho Marsu hansane ami fila ona ba Nasional” Lamesak dehan iha Intervista.

Lamesak nafatin husu ba Kandidatus sira atu konta historia ne’ebé lolos konaba partisipasaun Luta ba Libertasaun Nasional nian.

“Kandidatus sira ho istoria ne’ebe la hanesan, ne’ebe tenke deklara ho lolos, ne’ebe ami hein aponta deit saida maka sira koalia depois aban bainrua mesin maka sei halo koresaun hodi hatene sira passa ka Lae?” La Mesak dehan.

Responsável Nurep Holpilat Candido Gusmão “Mameran At” mensiona, total kandidatus ne’ebé rejistu iha tinan 2009 iha Suco Holpilat ne’ebé atu halo Verifikasaun hamutuk 518, no husi total ne’e, balun fila hikas ona ba aman maromak nia kadunan Santu.

” Kandidatus ne’ebe maka atu halo verifikasaun iha suku Holpilat Hamutuk 518, maibe husi total ne’e balu rejistu tiha mate ona, ne’ebe ida ne’ebe maka mate ne’e ninia oan sira bele aprezenta ninia dadus bainhira halo verifikasaun” Mameran At esplika.

Enkuantu Ekipa Komisaun sei halo Verifikasaun ba dadus Kandidatus Veteranus Iha Postu Maukatar hamutuk 1.600, hafoin kontinua Verifika iha Postu Suai.

Observasaun Jornalísta iha terenu hatudu, molok halo abertura Verifikasaun dadus Veteranus, Ekipa Komisaun halo vijita ba Semitériu no Sadan Mau Lela iha Foho Mabele hodi presta omenajem ba Komandante Jeral Komando Loe Mau Saudozu Albino do Carmo, ho nia soldadu sira ne’ebé mate iha 1976 tanba hetan tiru husi Inimigu Indonésia.

Jornalísta : Tynho Gusmão

Editór : Chamot Nahac