Covalima (RCCT) 14-06-21 Governo Timor-Leste iha esforsu bo’ot atu bele protégé nia Povu sira husi moras Covid-19, maka hetan apoio husi Kovax, hodi hetan tan Vasina Astrazaneka, hodi distribui ba Municipio sira, nune’e Sexta Feira ne’e (11-06) Ministério da Saúde (MS) transporta tan Vasina AstraZaneka mai Covalima hamutuk 643 avias, no uja ba doses hamutuk 6.430.
Ba Jornalísta sira, Diretor Aprovisamento Francisco Borges hateten, Vasina ne’e fo prioridade ba Linha Frente sira nebe maka hetan ona doze dahuluk, nomos ema Vulneravel sira.
“ Governo nia esforsu maka’as atu protégé nia povu husi moras ida ne’e, maka hetan tan apoio husi kovax, tanba ne’e maka tuir lista nebe maka aprovado, ami fahe ba Municipio sira nebe prioridade, Municipio Covalima ita lori Vasina AstraZaneka hamutuk, 643 Avas, se ita uja ba dozes karik 6.430, ida ne’e ita fo prioridade ba Linha Frente sira ne’ebe maka simu ona Priomeiro Dozes, nomos ba ema nebe maka idade adulto ona ka ita bele dehan ema vulneravel ” Katak Diretor Aprovisamento Francisco Borges
Diretor Aprovisamento Francisco Borges hatutan, Governo sei esforsu nafatin atu nune’e bele alkansa lalais númeru nebe maka bot konaba vasinasaun nian, maske nune’e Diretor Aprovisamento Francisco Borges husu ba Komunidade sira atu kontribui hodi simu vasinasaun hodi nune’e bele hetan susessu.
“ Agora dadauk ita nia Governo sei esforsu nafatin atu nune’e bele alkansa lalais númeru ne’ebe maka bot ka kobertura ne’ebe maka bot konaba vasinasaun nian, maibe agora ita nia Governo esforsu, maibe komunidade sira tenke kontribui, atu nune’e ita mos bele susessu ” Francisco dehan.
Iha Fatin hanesan Diretor Servisu Saúde Municipio Covalima Filipe Perreira Lemos haktuir, Segunda Feira ohin (14-06) sei halo lansamentu molok atu fo Vasinasaun etapa Segundo ba Linha Frente sira, no ba ema tinan 60 ba leten sei hein kartaun vasinasaun.
“ Vasina ne’ebe maka to’o mai atu responde ba Komunidade sira ne’ebe maka tinan 60 ba leten nomos ba Segunda Feira ne’e sei fo ba Linha Frente sira ne’ebe maka foin dadauk sira simu ona ne’e ” Diretur Servisu Saude Covalima, Filipe Perreira Lemos hakotu.
Engkuantu Aimoruk Vasina Covid-19 AstraZeneka nebe Ministerio Saude haruka mai Covalima ne’e SImu Direita husi Administrador Municipio Covalima Francisco de Andrade iha resinto Administrasaun Covalima Sexta Feira (11-06) Foin lalais
Jornalista : Tynho Gusmão & Ansa Nunes
Edítor : Chamot Nahac
