UNIZMA Covalima Konsidera Juiza Zulmira Kaer Deit Faktu Inventadu hodi Hamate Injustamentu

Unizma Pro-CPD RDTL Covalima realiza Komunikadu Imprensa iha Suku Matai Aldeia Kunain Kuarta-Feira ohin. Foto RCCT/ Tynho Gusmão

Covalima (RCCT) 12-01-22, UNIZMA Pro-CPD RDTL iha Munisipiu Covalima halo Konfrensia Imprensa iha Suco Matai Aldeia Kunain hasoru desizaun Juiza Zulmira Auxiliadora Barros da Silva husi Tribunal Distrital Dili (TDD) konaba Kazu disputa Rai Aimeti Laran iha Aldeia São Jose Suco Comoro, Postu Administrativu Dom Aleixo Munisipiu Dili.

Portavos Rozalino Cardoso alias Lakon Susar nia hateten Juiza Julmira Auxiliadora Barros da Silva kaer deit faktu inventadu hodi hamate injustamentu Manuel Gusmão nia Direitu konaba Uzu Kapiaun espesial husi Lei No.13/2017, Artigo 15⁰, 21⁰.

“Juiza Zulmira Auxiliadora Barros da Silva nunka hola parte Juiz koletivu ne’ebé kaer prosessu Justisa konaba rai Aimeti laran, ho tempu ne’ebé naruk nia kaer deit faktu inventadu ka falsu katak Manuel Gusmão so iha tinan 2009 mak okupa Rai Aimeti laran, hodi hamate injustamentu Manuel Gusmão nia diretu tomak konaba uzu kapiaun espesial husi Lei no.13/2017, Artigu 15⁰,21⁰, maibe tuir realidade Manuel Gusmão ho nia aman Kele-Gamu halo kedas iha fatin ne’e hodi uja ba To’os no Natar desde iha tinan 1962 to’o ohin loron” protavos dehan (12/01).

Portavos ne’e Kontinua, iha dokumentus notifikasaun konaba desizaun ne’e, tan ne’e tuir lolos Juiz Koletivu maka asina, maibe realidade hatudu Juiz Singular maka asina fali.

“Dignisma Juiza nia desizaun ne’e mos injusta tebes, tanba duránte hala’o julgamentu iha Tribunal konaba Kazu ne’e, ema ne’ebé prezide Meza ne’e husi Juiz Koletivu la’os Juiz Singular, maibe realidade hatudu oin seluk fali, tanba iha dokumentu notifikasaun konaba desizaun ne’e Juiz singular maka asina fali, La’os Juiz Koletivu maka asina, hahalok ne’e mos kontra ona regras Tribunal nian” Portavos Rozalino dehan.

Rozalino informa iha Prosesu anterior Manuel Gusmão sai ona Vensedor ba disputa rai ne’e, maibe Dignisma Juiza ne’e la konsidera desizaun Tribunal Distrital Dili (TDD) hodi hamosu fali desizaun kontraditóriu ba Rai Aimeti Laran.

“Dignisma Juiza ne’e la imparsial bainhira la konsidera faktus reais no kredibeis ne’ebé Manuel Gusmão nia testamuña aprezenta durante prosessu, la fo konsiderasaun maximu ba Tribunal Distrital Dili nia desizaun anterior ne’ebé Manuel Gusmão sai Vensedor tiha ona, hodi hamosu fali kontraditóriu 2 ba rai ida deit- Aimeti Laran, bazeia iha faktus mak hela iha Aimeti Laran, maibe nanis kedas husi Tinan 1962 mai oin ho nia aman Kele-Gamu, ne’ebe faktu konaba okupasaun iha tinan 2009 ne’ebe Juiza ne’e foti falsu no inventadu duni tanba kontra realidade” Portavos informa.

Entretantu UNIZMA husu ba Juiz/a hotu atu halo Justisa ho dalan los, no bainhira Juiz sira la fo konsiderasaun no la resposta pozitivu ba ezizénsia hirak ne’e, UNIZMA sei halo asaun bo’ot liu tuir lei inan artigu 42⁰, pontu 2, tanba RDTL nu’udar estadu de Diretu Demokratiku tuir Konstituisaun RDTL nian iha artigo 1⁰, pontu 1, K-RDTL nian artigu 2⁰, pontu 1 katak soberania hatur metin iha Povu.

Jornalista : Tynho Gusmão

Editór       : Chamot Nahac