Covalima (RCCT) 16-09-21, Ministerio Agrikutura e Peskas (MAP) Liu husi Departamentu Floresta iha Covalima Dezenvolve Floresta Komunitaria iha Postu Administrativu Lima iha Munisipiu Covalima hanesan Postu Fatumea, Fatululik, Fohorem, Maukatar no Zumalai.
Ba Jornalísta RCCT Xefe Departamentu Teritorial Floresta Munisipiu Covalima Francisco Sarmento hateten Floresta Covalima prepara hela Bibeirus Komunitaria (Ai oan) atu fornese ba Komunidade iha Postu Lima, hodi nune’e sira bele kuda rasik iha sira nia to’os nebe iha hodi proteje rai monu.
“Agora ne’e atividades barak uitoan, tanba ne’e maka dadaun ne’e Tékniku ho Guarda Floresta agora dezenvolve hela Floresta Komunitaria, ne’e iha Postu Lima, hanesan Fatumea, Fohorem, Fatululik, Maukata ho Zumalain, Objetivu ne’e atu fornese Bibeirus ba Komunidade sira para sira bele kuda iha sira nia to’os, inklui hare rai sira nebe maka halai, maibe la bele iha fatin mamuk tanba dala ruma bele estraga fali ” Francisco dehan.
Francisco esplika Bibeirus komunitariu nebe prepara atu distribui ba Komunidade iha Postu Lima hamutuk Ai oan Rihun Hitu nulu (70.000).
” Ai-Oan Komunitaria nebe maka ami prepara ne’e, ba Postu Fatumea 10.000, depois Fohorem 20.000, Postu Fatululik 10.000, Maukatar 10.000, depois Zumalai 20.000 nebe Ai-Oan hirak ne maka prepara atu fornese ba Komunidade sira para sira bele kuda iha sira nia to’os ou iha Fatin nebe maka seguru” Tenik Nia
Xefe Departamentu Teritorial Floresta Covalima Francisco Sarmento Mensiona Ai oan nebe maka atu fo Komunidade sira iha Postu Lima kompostu husi Ai Kakeu, Ai Mahuni, Ai Samatuku hodi nune’e proteje rai monu.
” Ai nebe maka ami prepara ne’e maka Ai Mahuni, Ai Samatuku, Ai Kakeu hodi nune’e proteje rai nebe maka halai sira ne’e ” Francisco dehan.
Entretantu iha Fulan Dezembru tinan ne’e, no Fulan Janeiru tinan oin, Floresta Covalima sei hahu distribui Bibeirus ne’e ba Komunidade sira iha Postu Lima, Nune’e Francisco dehan Komunidade sira labele kuda iha Fatin nebe abandona tanba tuir Diresaun Jeral Floresta no Ministériu Agrikultura katak Komunidade sira maka sei sai nain ba ai hirak ne’e.
Jornalísta : Tynho Gusmão
Editor : Chamot Nahac
